Ажилтнуудаа "үнэ цэнгүй" гэж хэлсэн банкны захирал уучлалт гуйв
Standard Chartered банкны гүйцэтгэх захирал Билл Уинтерс хиймэл оюун ухааны нөлөөгөөр цомхотголд орох ажилтнуудыг "үнэ цэн багатай хүн капитал" хэмээн нэрлэж, хүчтэй шүүмжлэлд өртсөний эцэст албан ёсоор уучлалт гуйжээ.
Түүний хэлсэн үг банкны ажилтнууд төдийгүй олон нийт, салбарын бусад удирдлагуудын дунд ихээхэн бухимдал үүсгэсэн байна.
Хонконгт болсон хөрөнгө оруулагчдын уулзалтын үеэр тэрээр банкны дунд хугацааны стратегийг танилцуулахдаа 2030 он гэхэд хиймэл оюун ухааныг нэвтрүүлэхтэй холбоотойгоор арын албаны 7800 орчим ажлын байрыг буюу нийт ажиллах хүчний 15 хувийг цомхотгох төлөвлөгөөтэй байгаагаа мэдэгджээ.
Энэ үеэр Билл Уинтерс сэтгүүлчид болон хөрөнгө оруулагчдад хандан "Энэ бол зүгээр нэг зардал танах үйл явц биш. Зарим тохиолдолд бид үнэ цэн багатай хүн капиталыг санхүүгийн капитал болон хөрөнгө оруулалтаар сольж байгаа хэрэг" хэмээн ярьсан нь маргааны эх үүсвэр болсон юм.
Энэхүү мэдэгдэл цахим орчинд маш хурдан тархаж, хүмүүсийн анхаарлын төвд орсон байна. Reddit болон Hacker News зэрэг нийгмийн сүлжээний платформуудад хэрэглэгчид түүний үгийг "харгис" хэмээн тодорхойлж, чинээлэг удирдлагууд жирийн ажилчдын бодит амьдралаас хэрхэн тасарсан байдгийн тод жишээ хэмээн шүүмжилжээ. Түүнчлэн санхүүгийн салбарын бусад удирдлагууд ч өөрсдийн байр суурийг илэрхийлсний дотор JPMorgan Chase банкны гүйцэтгэх захирал Жэйми Даймон түүний үг хэллэгийг "маш бүдүүлэг сонголт байсан" хэмээн тодотгосон байна.
Нөхцөл байдлыг намжаахын тулд Билл Уинтерс эхлээд банкны дотоод сүлжээгээр дамжуулан ажилтнууддаа санамж бичиг илгээж, хэлсэн үгийг нь контекстээс салгаж мушгин гуйвуулсан хэмээн тайлбарлахыг оролджээ. Гэвч шүүмжлэл тасрахгүй байсан тул тэрээр LinkedIn сүлжээнд хоёр ч удаа нийтлэл оруулсан байна. Эхний нийтлэлдээ "үнэ цэн багатай ажлын байрууд автоматжуулалтад илүү өртөмтгий байдаг" гэсэн санааг илэрхийлэхийг хүссэнээ тайлбарласан бол, дараагийн нийтлэлдээ "Миний сонгосон үг хэллэг зарим хамт олныг гомдоосонд гүнээ хүлцэл өчье" хэмээн шууд уучлалт гуйжээ.
Өөрийн байр суурийг хамгаалахын тулд тэрээр Хонконгт хэлсэн үгийнхээ бүрэн эх бичвэрийг уучлалт гуйсан нийтлэлдээ хавсаргасан байна. Уг бичвэрт банк бүх ажилтнаа үнэлдэг бөгөөд технологийн хурдацтай өөрчлөлтөд дасан зохицох шаардлагатай болсон ажилчдаа дахин сургах, өөр ажлын байранд шилжүүлэхэд онцгой анхаарч байгааг харуулсан гэж тэрээр маргажээ.
Хэдийгээр албан ёсоор уучлалт гуйж, нэмэлт тайлбар өгсөн ч цахим орчин дахь ажиглагчид болон шүүмжлэгчид түүний анхны сонгосон үг хэллэг, хандлагыг буруутгасан хэвээр байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.