ОХУ Калининградыг бүсэлбэл цөмийн зэвсэг ашиглахаа НАТО-д сануулав

Хэрэв НАТО-гийн орнууд Калининград мужийг эх газраас нь бүрэн тусгаарлах буюу бүслэлт хийхийг завдвал газар нутгаа хамгаалахын тулд цөмийн зэвсэг багтсан бүхий л зэвсэглэлээ ашиглахад бэлэн гэдгээ ОХУ-ын дипломат төлөөлөгчийн газрууд хатуу мэдэгдлээ.

Ирланд дахь Оросын Элчин сайдын яамнаас гаргасан албан ёсны мэдэгдэлд барууны орнуудын дунд Калининград мужийг агаар болон тэнгисээр бүслэх тухай төлөвлөгөө яригдаж буйд онцгой анхаарал хандуулсан байна. Энэхүү асуудал нь хийсвэр сэдэв биш, харин тус улсын аюулгүй байдалд бодитой түгшүүр төрүүлж буй үйл явдал гэдгийг цохон тэмдэглэжээ. Түүнчлэн Европын улс төрийн хүрээллийн төлөөлөгчдийг “аюултай тоглоом” өрнүүлж байна хэмээн буруутгасан юм.

Хэрэв бүслэлтийн хувилбар хэрэгжиж эхэлбэл талуудын хооронд шууд зэвсэгт мөргөлдөөн үүсэх эрсдэл эрс нэмэгдэхийг анхааруулсан байна. Үүний үр дүнд сөргөлдөөний эхний шатанд л ОХУ-ын зүгээс цэргийн эвслийн орнуудын шийдвэр гаргах төвүүдэд урьдчилан цохилт өгөх магадлал бий болохыг дипломат төлөөлөгчийн газар сануулжээ.

Үүнтэй зэрэгцэн Их Британи дахь ОХУ-ын Элчин сайдын яам мөн хатуу байр суурь илэрхийллээ.

Британийн "The i Paper" сонинд Калининградын бүрэн эрхт байдлыг хүлээн зөвшөөрөхгүй байх тухай агуулгатай нийтлэл болон сөргөлдөөний нөхцөл байдлыг загварчилсан "Sky News" телевизийн "The Wargame" төслийн эсрэг Оросын тал эсэргүүцэл үзүүлсэн байна. Лондон дахь төлөөлөгчийн газар Их Британи болон НАТО-гийн цэргийн аливаа ажиллагаанд цөмийн зэвсгээр бүрэн хариу барихаа мэдэгдэв.

Нөхцөл байдлыг улам хурцатгаж буй өөр нэг хүчин зүйл нь Польшийн Гадаад хэргийн сайд Радослав Сикорский Калининград мужийн хилийн ойролцоо НАТО-гийн цэргийн сургуулилалтыг эрчимжүүлэхийг уриалсан явдал юм. Стратегийн гол бүс нутгийг тойрсон цэрэг-улс төрийн энэхүү дарамт шахалт нь олон улсын түвшинд томоохон хэмжээний зэвсэгт мөргөлдөөн үүсгэх ноцтой үр дагавартай байна.

Эх сурвалж:

• nsn.fm

• lenta.news

• news.rambler.ua

• armenianreport.com

• sotaproject.com