SpaceX компани хөрөнгийн биржид гарч, Илон Маск дэлхийн анхны их наядтан болох нь
Илон Маскийн үүсгэн байгуулсан пуужин болон хиймэл дагуулын SpaceX компани АНУ-ын хөрөнгийн биржид нээлттэй хувьцаат компани болох хүсэлтээ 2026 оны тавдугаар сарын 20-ны өдөр албан ёсоор гаргалаа.
Тус компани 1.75 их наяд ам.долларын үнэлгээтэйгээр 75-80 тэрбум ам.долларын хөрөнгө оруулалт татахыг зорьж байгаа бөгөөд энэ нь дэлхийн түүхэн дэх хамгийн том анхдагч хувьцааны санал (IPO) болох хүлээлттэй байна.
Санхүүгийн энэ томоохон үйл явдал нь 2019 онд Саудын Арабын "Saudi Aramco" компанийн тогтоож байсан 29.4 тэрбум ам.долларын дээд амжилтыг хол хаях юм.
Компанийн албан ёсны тайланд тусгаснаар SpaceX өнгөрсөн 2025 онд 18.67 тэрбум ам.долларын орлого олсон нь өмнөх оныхоос 33 хувиар өссөн үзүүлэлт болжээ. Орлогын дийлэнх хэсгийг дэлхийн тойрог замд арюан мянга орчим хиймэл дагуул байрлуулсан "Starlink" интернетийн үйлчилгээ бүрдүүлж байна.
Шинжээчдийн таамаглаж байгаагаар тус компанийн хувьцаа ирэх зургаадугаар сарын дундуур буюу 12-ны өдөр "Nasdaq" бирж дээр албан ёсоор арилжаалагдаж эхлэх аж.
Хөрөнгийн зах зээл дэх уг түүхэн алхам нь Илон Маскийн хувийн хөрөнгийн хэмжээг огцом нэмэгдүүлж, түүнийг дэлхийн анхны "их наядтан" болгох магадлалтай байна. Одоогийн байдлаар түүний хөрөнгө 460-аас 667 тэрбум ам.доллароор хэмжигдэж байгаа бөгөөд тэрээр компанийн 42 хувийг эзэмшихийн зэрэгцээ саналын эрхийн 85 хувийг дангаар хянадаг. Хэрэв SpaceX-ийн үнэлгээ зорьсон 1.75 их наяд ам.долларт хүрвэл Маскийн нийт хөрөнгө 950 тэрбум ам.долларыг давж, нэг их наядын босгыг давах бүрэн боломжтой болохыг эдийн засагчид тооцоолжээ.
Үүний зэрэгцээ компанийн ирээдүйн өсөлтийг дэмжих зорилгоор хиймэл оюун ухаан болон сансрын өгөгдлийн төвүүдэд түшиглэх стратеги баримталж байна.
Энэ хүрээнд 2026 оны эхээр Илон Маскийн үүсгэн байгуулсан "Grok" чатботыг хөгжүүлэгч "xAI" компанийг 250 тэрбум ам.доллароор үнэлж, SpaceX-тэй нэгтгэсэн болохыг баримт бичигт онцолсон байна. Тус компани хүн төрөлхтнийг олон гаригт амьдрах боломжтой болгох, орчлон ертөнцийн мөн чанарыг ойлгох үндсэн зорилгоо албан ёсны танилцуулгадаа дахин баталгаажуулжээ.
Хэдийгээр хөрөнгө оруулагчдын дунд хүлээлт маш өндөр байгаа ч санхүүгийн шинжээчид зах зээлд үүсэж болзошгүй эрсдэлийг анхааруулсаар байна.
Мэргэжилтнүүдийн үзэж байгаагаар Илон Маскийн нэр хүнд хувьцааны эрэлтийг асар ихээр нэмэгдүүлэх хэдий ч, нөгөөтэйгүүр түүний удирддаг "Tesla" зэрэг бусад нээлттэй компаниудын адилаар урт хугацаандаа хувьцааны ханшийн огцом хэлбэлзлийг бий болгох "Илон Маскийн нөлөө" ажиглагдах өндөр магадлалтай юм.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.