Их Британи Оросын уран импортлохыг бүрэн хориглов
Их Британийн Бизнес, худалдааны яамнаас ОХУ-ын ураны импортод тавих хориг арга хэмжээг өргөжүүлэх шинэ журам баталж, 2026 оны тавдугаар сарын 20-ны өдрөөс албан ёсоор хэрэгжүүлж эхэллээ.
Энэхүү шийдвэр нь тус улсын эрчим хүчний хараат бус байдлыг хангах, барууны холбоотнуудаас авах нийлүүлэлтээ нэмэгдүүлэх зорилготой бөгөөд Оросын эсрэг авч хэрэгжүүлж буй эдийн засгийн хязгаарлалтыг улам бүр чангатгаж байна.
Шинэ хязгаарлалт нь маш өргөн хүрээг хамарч байгаа бөгөөд Орос улсаас гаралтай, тус улсад байрлаж буй, эсвэл тэндээс тээвэрлэгдсэн аливаа уранд хамаарна.
Тодруулбал, Оросын ураныг шууд болон шууд бусаар импортлох, худалдан авах, нийлүүлэхийг хатуу хориглосон байна. Түүнчлэн Их Британийн иргэд, аж ахуйн нэгжүүд үүнтэй холбоотой техникийн туслалцаа, санхүүгийн үйлчилгээ, зуучлалын үйл ажиллагаа үзүүлэх эрхгүй болжээ. Мөн 2026 оны тавдугаар сарын 20-ноос хойш ашиглалтад орох гуравдагч орны цөмийн цахилгаан станцуудад Оросын уран нийлүүлэхийг зогсоосон байна.
Гэхдээ дэлхийн цөмийн аюулгүй байдал болон одоо ашиглагдаж буй дэд бүтцийг хамгаалах үүднээс хууль тогтоомжид хэд хэдэн онцгой нөхцөлийг тусгажээ. Хэрэв гуравдагч орны цөмийн байгууламж дээрх хугацаанаас өмнө үйл ажиллагаа явуулж эхэлсэн бөгөөд хэвийн ажиллахад нь Оросын уран зайлшгүй шаардлагатай бол хоригоос чөлөөлөгдөнө. Мөн хориг хэрэгжиж эхлэхээс өмнө ОХУ-аас худалдан авч, экспортолсон бөгөөд одоогоор өөр улсад хадгалагдаж байгаа уранд энэхүү хязгаарлалт үйлчлэхгүй юм.
Энэхүү шийдвэр нь Их Британийн эрчим хүчний шилжилтийн төлөвлөгөөг ихээхэн хурдасгаж байна. Засгийн газар 2025 оны сүүлээр Оросын уранаас татгалзах хугацааг 2030 он байсныг 2028 он болгон наашлуулж байсан бол ийнхүү шууд хэрэгжүүлэхээр боллоо. Өмнө нь Их Британийн цөмийн цахилгаан станцуудын импортын тав орчим хувийг Оросын түлш бүрдүүлдэг байсан бөгөөд цаашид АНУ болон барууны бусад холбоотнуудын нийлүүлэлтэд бүрэн түшиглэхээр төлөвлөж байна.
Ураны импортод тавих хяналтыг чангатгахын зэрэгцээ Их Британийн Сангийн яам газрын тосны боловсруулсан бүтээгдэхүүний хязгаарлалтыг тодорхой хэмжээнд сулруулсан нь анхаарал татаж байна. Гуравдагч оронд Оросын түүхий газрын тосноос боловсруулсан дизель түлш, керосин импортлохыг зөвшөөрсөн хугацаагүй, нээлттэй тусгай зөвшөөрлийг мөн өдрөөс эхлэн олгожээ. Энэ нь Оросын газрын тосны шууд импортын хориг хэвээр байх хэдий ч, өөр улсад боловсруулсан бүтээгдэхүүнийг дотоодын зах зээлд нэвтрүүлэхийг зөвшөөрч буй хэрэг бөгөөд дэлхийн эрчим хүчний бодлогын нарийн тэнцвэрийг хадгалах гэсэн оролдлого болж байна.
Эх сурвалж:
• news.ru
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.