БНСУ-ын "Старбакс"-ын захирал түүхэн эмзэг сэдвээр маркетинг хийсэн хэргээр халагдав
Өмнөд Солонгосын жижиглэн худалдааны "Шинсэге" (Shinsegae) группийн охин компани болох "Старбакс Солонгос" компани 2026 оны 5 дугаар сарын 18-ны өдөр "Танкны өдөр" хэмээх урамшууллын аян эхлүүлсэн нь олон нийтийн дунд хүчтэй эсэргүүцэлтэй тулгарч, улмаар гүйцэтгэх захирал Сон Жон Хён албан тушаалаасаа халагдахад хүрчээ.
Энэхүү сурталчилгаа нь тус улсын Ардчиллын хөдөлгөөний 46 жилийн ойтой яг давхацсан бөгөөд түүхэн эмзэг үйл явдлуудыг сануулсан зохисгүй үг хэллэг ашигласан нь ийнхүү томоохон дуулиан дэгдээх үндэс болсон байна.
Тус компанийн зүгээс халуун савны хямдралд зориулан гаргасан сурталчилгаандаа "5/18" гэсэн огноог "Танкны өдөр" гэх үгтэй хослуулж, "Ширээн дээр 'Так' хийх чимээтэйгээр тавь" гэх уриаг ашиглажээ.
Энэ нь Өмнөд Солонгосын цэргийн дарангуйллын үеийн хамгийн аймшигт хоёр үйл явдлыг иргэдийн ойд сэдрээсэн байна.
Тодруулбал, 1980 оны 5 дугаар сарын 18-нд дарангуйлагч Чон Ду Хуан Кванжу хотод ардчиллын төлөө жагссан оюутнуудын эсрэг цэргийн танк, хуягт машин илгээн цус урсган дарсан бол, "Так" гэх чимээ нь 1987 онд оюутан Пак Жон Чолыг эрүүдэн шүүж хөнөөсөн цагдаа нар "ширээг так хийтэл цохитол цочролд орж нас барсан" хэмээн худал мэдүүлж байсан түүхтэй шууд холбогддог байна.
Түүхэн шархыг хөндсөн уг үйлдэл нь нийгэмд асар хурдацтай, хүчтэй эсэргүүцэл дагууллаа.
Хэрэглэгчид урьдчилсан төлбөрт картынхаа мөнгийг буцаан олгохыг шаардаж, Старбакс болон Шинсэге группийг бойкотлож эхэлсэн юм. Кванжу-Чоннам мужийн дурсгалын, эвсэл зэрэг хохирогчдын төлөөллийн байгууллагууд уг сурталчилгааг амь үрэгдэгсдийн цуст тэмцлийг "хорон санаагаар доромжилсон хэрэг" хэмээн хатуу буруушаав. Түүнчлэн Өмнөд Солонгосын Ерөнхийлөгч И Жэ Мён "Х" (хуучнаар Твиттер) цахим хуудсаараа дамжуулан уг үйлдлийг "хүнлэг бус", Кванжугийн иргэдийн тэмцлийг гутаасан хэрэг хэмээн эгдүүцэж байгаагаа илэрхийлээд, хохирогчдын ар гэрийнхнээс биечлэн уучлалт гуйхыг шаардсан байна.
Үндэсний хэмжээний эсэргүүцэлтэй нүүр тулсан компанийн удирдлагууд яаралтай арга хэмжээ авч эхэлсэн байна. Шинсэге группийн ТУЗ-ийн дарга Чон Юн Жин уг хэрэгт маш ихээр хилэгнэж, дотоод хяналт шалгалтыг хатуу явуулахыг үүрэг болгожээ.
Тэрээр бусдад сургамж болгох үүднээс Старбакс Солонгос компанийн гүйцэтгэх захирал Сон Жон Хён болон уг аяныг төлөвлөж, удирдсан нэр бүхий удирдах албан тушаалтныг нэн даруй ажлаас нь халав. Старбакс Солонгос компани арга хэмжээ эхэлснээс хэдхэн цагийн дараа сурталчилгааг зогсоож, албан ёсны цахим хуудсаараа дамжуулан түүхэн ач холбогдолтой үг хэллэгүүдийг буруугаар ашиглаж гүн шарх үлдээсэндээ уучлалт гуйсан байна.
Энэхүү үйл явдал нь томоохон корпорациудын маркетингийн үйл ажиллагаанд түүхэн мэдрэмж, нийгмийн хариуцлага ямар чухал болохыг харуулсан ноцтой сургамж болж үлдлээ.
Старбаксын дэлхийн төв оффисоос Кванжугийн ард иргэд болон эмгэнэлт явдалд өртсөн бүх хүмүүсээс уучлалт гуйсан цахим шуудан илгээсэн бөгөөд цаашид ийм алдааг давтахгүй байхын тулд дотоод хяналтын стандарт, компанийн хэмжээний сургалтыг эрчимжүүлэхээ амласан нь олон улсын бизнесийн орчинд ч анхаарал татсан алхам болж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.