Г.Дамдинням: Нөхцөл байдалдаа зохицуулан хичээлийн хуваарийг өөрчлөх боломжтой

УИХ-ын нэр бүхий гишүүд өвөлжилт хүндэрсэн үед орон нутгийн сурагчдын хичээлийн хуваарьт зохицуулалт оруулах шаардлагатай гэж БШУ-ны сайдад санал хүргүүлж байжээ. Тэгвэл УИХ-ын гишүүн Г.Дамдинням дахин энэ асуудлыг хөнджээ. 

Тэрээр, Хичээл сургалтын үйл ажиллагааг хот суурин газарт хэвийн хуваариар явуулаад хөдөө орон нутагт нөхцөл байдалд зохицуулан өөрчлөх боломж Боловсролын шинэ хуулиар бий болсон.

Байгалийн давагдашгүй гамшиг, зудын улмаас хөдөө, орон нутагт хүн хүч асар их дутагдалтай байна. Хичээл сургуульд явах бага насны хүүхдээ нэг нь дагаад сум суурин бараадах эсвэл мал ахуй, амьжиргааны эх үүсвэрээ хамгаалж мал дээрээ үлдэх гэсэн хэцүү нөхцөл малчдад маань тулж байна.

Мөн ахлах ангийн хүүхдүүд ч эцэг эхдээ туслах зайлшгүй нөхцөл байдал үүссэн байна.

Бидний хэдэн гишүүд ч 2023.12.08-нд хаваржилт хүндрэхээс өмнө бэлтгэл хангах зорилгоор БШУ-ны сайдад хүүхдийн сургуулийн амралтыг зохицуулах бэлтгэл хангах тухай бичгийг явуулж байлаа.

Иймд Засгийн газар дээрх мэдээлэлдээ үндэслээд БШУ сайд сурагчдын амралттай холбоотой зохицуулалтын шийдвэрийг Боловсролын багц хуультай уялдуулан яаралтай гаргах хэрэгтэй байна.