Өнгөрөгч амралтын өдрүүдэд С.Эрдэнэ, М.Энхсайхан тэргүүтэй Ардчилсан нам их хурлаа хийж, даргаараа Д.Ганбатыг сонгон батламжилсан. Тэгвэл түүнийг өнөөдөр /2023.01.31/ АН-ын даргаар бүртгүүлэх хүсэлтийг Улсын дээд шүүхэд хүргүүлэв. 

АН-ын Ерөнхий нарийн бичгийн дарга Д.Эрдэнэсувд: 

-Д.Ганбатыг Ардчилсан намын даргаар бүртгүүлэх хүсэлтийг Улсын дээд шүүхэд хүргүүлж байна. Ардчилсан намын төлөөллийн төв байгууллага буюу эрх бүхий байгууллага Үндэсний бодлогын хорооны нэгдүгээр сарын 25-ны өдрийн хурлаар Ардчилсан намын дарга С.Эрдэнийн хүсэлтийн дагуу Ардчилсан намын даргыг сонгох сунгааг зарласан. Энэ сунгаанд Ардчилсан намын 200 мянган гишүүдээс 143.500 саналын эрхтэй гишүүд санал хураалтад оролцсон. Даргын сунгаанд долоон хүн нэр дэвшсэнээс 22 мянган хүний буюу хамгийн өндөр санал авсан Д.Ганбатыг Ардчилсан намын даргаар сонгосон. Өнгөрсөн долоо хоногт болсон Ардчилсан намын ээлжит бус XVI их хурлаар намын даргыг ёсчлон батламжилсны дагуу өнөөдөр Дээд шүүхэд материалаа хүргүүлж байна. Саналын эрхтэй 79 мянган гишүүн тус хуралд оролцсон байгаа.

Монгол Улсад бүртгэлтэй нэг л Ардчилсан нам байгаа. Тэр бүртгэлтэй намын дарга нь С.Эрдэнэ гэж хүн. Ардчилсан намын дүрмийн бүрэн эрхтэй 248 ҮБХ-ны гишүүд тус хуралд оролцож даргын сунгааг зарласан. Бүрэн эрхийн чадамжтай их хурлаар намын даргын сонгууль явагдсан. Бид дүрмийн дагуу үйл ажиллагаа явуулж байна. 143.500 хүн тус даргын сонгуульд оролцсон. Шинэчилсэн бүртгэлээр санал өгөх эрхтэй хүмүүс саналаа өгсөн. Даргын сунгааны үеэр нэг дор маш олон хүн санал хураалтад оролцсон учраас мессеж давхцаж очих тохиолдол гарсан. Гэхдээ нэг хүн нэг л удаа санал өгөх эрхтэй код байдаг. Тийм учраас нэг хүнд олон мессеж очсон ч нэг кодоор нэг л удаа санал өгч байгаа. 

Л.Гүндалай нэр дэвшигчийн хувьд Ардчилсан намын цахим санал хураалтад гурван удаа оролцож байгаа хүн. АН өнөөдрийг хүртэл цахим нам болох үйл ажиллагааныхаа хүрээнд бүх гишүүдийнхээ оролцоог хангах үүднээс цахим санал хураалтыг удаа дараа амжилттай зохион байгуулж ирсэн. Энэ удаад ч хууль дүрмийнхээ дагуу зохион байгуулагдсан гэв. 

---