Сергей Лавров: "Бид дахиж хэзээ ч Барууны орнуудад найдахгүй"

ОХУ цаашид эдийн засгаа Барууны Засгийн газар, компаниудаас огт хамааралгүй болгоно гэж тус улсын Гадаад хэргийн сайд Сергей Лавров мэдэгджээ. Тэрээр Анталия хотод болсон дипломат уулзалтын үеэр Украин, Туркийн түншүүд болох Дмитрий Кулеба, Мевлүт Чавушоглу нартай хэлэлцсэнийхээ дараа ийнхүү мэдэгдэл хийсэн байна.

Лавров Оросын эдийн засгийн нөхцөл байдлын талаар "Бид дахиж хэзээ ч Барууны орнуудад найдахгүй байхаар энэ асуудлыг шийднэ. Бизнесийн ашиг сонирхолд огт хөтлөгдөөгүй, харин улс төрийн түрэмгийллийн хэрэгсэл болсон Засгийн газар эсвэл компаниудаас хамааралгүй болно. Улс орон маань ийм нөхцөл байдалд дахин хэзээ ч орохгүй бөгөөд манай эдийн засгийг сүйрүүлэх боломжийг хэнд ч олгохгүй" хэмээн анхааруулжээ.

Тэрээр мөн "Бид Барууны орнуудаас хамааралгүй болох арга замыг олох болно. Үүнийг аль эрт хийх ёстой байсан" гэж нэмж хэлсэн байна.

Түүнчлэн Барууны улс орнууд ОХУ-ыг элдвээр нэрлэж, хориг арга хэмжээ аван, компаниудаа гаргаад байгаа ч хүйтэнд даарахгүйн тулд газрын тос, байгалийн хийг нь худалдаж авсаар байгааг Лавров онцолсон юм.

Эх сурвалж: TASS