Талбайн өлсгөлөнг зогсоосон цаад шалтгаан эхнээсээ тодорч эхэллээ

О.Цогтгэрэл даргатай Ардчилсан нам болон УИХ дахь АН-ын бүлгийн гишүүдийн долоо хоног үргэлжилсэн өлсгөлөн гэнэтхэн зогссон цаад учир шалтгаан эхнээсээ тодорч эхэллээ. 

Өөрөөр хэлбэл, МАН, АН зөвшилцөх ажлын хэсэг гарсан нь шалтаг ба шалтгаан нь өөр зүйл байжээ. АН-аас Ерөнхийлөгчийн сонгуульд нэр дэвшсэн, Ерөнхий сайд асан, УИХ-ын гишүүн Н.Алтанхуягийг материалыг СЕХ хүлээн авахаас татгалзсан. Уг үйлдэлд тус намын зүгээс Захиргааны хэргийн шүүхэд нэхэмжлэл гаргасныг тус шүүхийн шүүгч хүлээн аваагүй юм. 

Гэтэл Захиргааны хэргийн давж заалдах шатны шүүхэд гомдол гаргахад, шүүх бүрэлдэхүүн хэлэлцээд анхан шатны шүүгчийн захирамжийг хүчингүй болгож, СЕХ-ны үйлдэлд эрүү үүсгэхээр болсон талаар "Монголын мэдээ" сонин мэдээллээ. 

Ингэснээр О.Цогтгэрэл даргатай АН-аас Н.Алтанхуяг Ерөнхийлөгчийн сонгуульд нэр дэвшиж магадгүй болчихлоо. М.Тулгат даргатай АН-аас нэр дэвшиж, энэ сарын 24-нд нэр дэвшигчийн үнэмлэхээ авахаа догдлон хүлээж байгаа С.Эрдэнийн горьдлого талаар болж магадгүй болчихжээ. 

Тодруулж хэлбэл, СЕХ нэр дэвшигч Н.Алтанхуягийн материалыг хүлээн авч шийдвэрлэх эсэх асуудлыг шүүх шийдвэрлэхээр болсон байна. 

Сүхбаатарын талбайд долоо хоног үргэлжилсэн "өлсгөлөн" гэнэтхэн зогссон цаад жинхэнэ шалтгаан нь эхнээсээ  ийнхүү тодорч байна.

Ерөнхийлөгчийн сонгуульд У.Хүрэлсүх, Н.Алтанхуяг, Д.Энхбат нар дэвшвэл "Гарьд магнай" кинонд гардагчлан сонгогч түмэн "үзэх юмтай, хариад ярих юмтай" болох нь ээ.