Өнгөрсөн даваа гарагаас Улаанбаатараас орон нутаг руу иргэдийг зорчуулж эхэлсэн. УОК-ын өгч байгаа мэдээллээр орон нутаг руу зорчих гэр бүлийн нэг гишүүн PCR шинжилгээ өгөхөд болно гэсэн. Өнөөдрийн байдлаар нийслэлийн хэмжээнд 18 цэгт PCR шинжилгээ авч байна. Гэвч СХД-ийн 62-р сургууль дээр орон нутаг зорчих иргэд PCR шинжилгээ өгөхөөр бөөгнөрөл үүсгээд байгаа нөхцөл байдлыг сурвалжиллаа.

Шинжилгээ өгөхөөр ирсэн иргэдийн хувьд eruul.gerege.mn бүртгүүлж цаг авсан ч цагаар нь оруулахгүй 2-3 цаг дугаарлаж байна гэсэн юм. Уг шинжилгээний төвд зохицуулалт хийж байгаа цагдаагийн албаны хүн “Иргэдийн хувьд хэрхэн цаг авч үйлчлүүлэхээ мэдэхгүй байна. Цаг аваагүй иргэд ирж дараалал үүсгэж байна. Цаг авсан иргэдийг оруулж байгаа” гэх тайлбарыг өгсөн юм.

Шинжилгээний төвүүдийн ачаалал үнэхээр нэмэгдсэн эсэхийг eruul.gerege.mn руу хандан орон нутаг руу зорчих гэдгийг сонгох харахад БГД, СХД, ЧД-ийн шинжилгээний цэгүүдийн өнөөдрийн цаг 13.40 цагт дууссан байсан бол бусад дүүргүүд дэх шинжилгээний цэгүүдэд цаг олгож байсан юм.

Орон нутаг руу явах иргэдийг заавал СХД-т байрлах 62 дугаар сургуулийн цэгт шинжилгээ өг гэж заагаагүй бөгөөд eruul.gerege.mn бүртгэлтэй байгаа бусад цэгүүдэд цаг авч шинжилгээ өгөх боломжтой.

Нийслэлийн хэмжээнд шинжилгээ авч буй цэгүүдийн байршил, цагийн хуваартай энд дарж танилцана уу. 

 

---