Казахстанд гадаадын иргэдийг тариалангийн газар өмчлөхийг хоригложээ

Казахстан улс гадаадын иргэдийг газар тариалангийн талбай өмчлөн, түрээслэхийг хориглох болно гэж тус улсын Ерөнхийлөгч Касым-Жомарт Токаев өнгөрөгч пүрэв гарагт мэдэгджээ.

Казахстан нь үр тариа, тослог ургамлын үр, махны томоохон үйлдвэрлэгч бөгөөд таван жилийн өмнө тус улсын эрх баригчид тариалангийн талбайн зах зээлээ нээж, хөдөө аж ахуйдаа гадаадын хөрөнгө оруулалтыг татахаар шийдсэн байна. Гэвч иргэд энэхүү төлөвлөгөөг эсэргүүцэн, гудамжинд жагсах болсон юм. Идэвхтнүүд хөрш зэргэлдээ Хятад улс тус улсын бүх тариалангийн газар, бэлчээрийн талбайг эзэмшдэг болох вий гэж эмээж байгаагаа илэрхийлжээ.

Үүний дараагаар Казахстаны Засгийн газар уг төлөвлөгөөг энэ он хүртэл хүчингүй болгоод байсан юм. Тэгвэл Ерөнхийлөгч Токаев энэхүү хориг хэвээр үлдэнэ гэж мэдэгдсэн байна. Тэрээр "Газар өмчлөлийн асуудал нь манай иргэдийн хувьд үргэлж чухал асуудал байсаар ирсэн. Манай газар нутаг бол бидний тусгаар тогтнолын түшиг тулгуур бөгөөд ариун бэлгэдэл. Иймээс би хөдөө аж ахуйн зориулалттай газар нутгийг гадаадын иргэд болон гадаадын хуулийн этгээдэд худалдах, түрээслэхийг хориглож байна. Үүнд гадаадын хувьцаа эзэмшигчтэй хуулийн этгээд орно" хэмээн мэдэгджээ.

БНХАУ НЬ Казахстаны худалдааны гол түнш, зээл олгогч ба хөрөнгө оруулагч хэдий ч сүүлийн жилүүдэд нутгийн иргэдийн дунд Бээжингийн эсрэг үзэл бодол нэмэгдэх болсон байна.

Эх сурвалж: Reuters