Японы Аичи мужийн Нагояа хотын "Bic Camera" цахилгаан барааны дэлгүүрт 48 настай нэгэн эрэгтэй орж ирээд, "Би коронатай!" гэж хашхиран, үймээн дэгдээн, баривчлагдаж байсан хэрэг өнгөрсөн сард гарсан. Тэгвэл холбогдох шүүхээс түүнд 10 сарын хорих ял оноохоор шийдвэрлэсэн байна.

Хэрэг гарах үеэр тус эрэгтэй дэлгүүрийн ажилчид түүнийг удаан хүлээлгэсэнд уурлаж бухимдсан байсан хэмээн цагдаагийн тайланд тэмдэглэжээ. Хүлээж ханасан эрэгтэй удалгүй өөрийгөө коронавирусээр халдварласан хэмээн зарлахаар шийдэн, дэлгүүрт үймээн самуун үүсгэсэн байна. Тэрээр мөн энэ явдлын үеэр архи согтууруулах ундаа хэрэглэсэн байсан бөгөөд дараа нь "Би "Корона" шар айраг ууж байна гэж хэлсэн" хэмээн мэдэгдсэн юм.

Түүний энэ үйлдлийн улмаас тус дэлгүүр ариутгал, халдваргүйжүүлэлт хийхийн тулд хаалгаа барин, үйл ажиллагаагаа зогсоох шаардлагатай болсон нь эдийн засгийн томоохон уналтын босгон дээр байгаа энэ үед маш их өртөг, алдагдалтай үйл явц билээ. Дэлгүүрт үүссэн энэхүү эдийн засгийн нөлөө ба бусад хүмүүс тус эрэгтэйг дуурайн, ижил төрлийн үйлдэл гаргахаас сэргийлэн, түүний хэргийг жишээ болгон ийнхүү хүнд ял оноосныг албаныхан онцолсон байна.

Хэдхэн үг хэлснийхээ төлөө өөрийгөө хэтэрхий урт хугацааны хорих ял сонслоо гэж үзсэн эрэгтэй давж заалдах шатны шүүхэд хандсан боловч Нагояагийн дээд шүүхийн шүүгч Шинжи Кано анхны шийдвэрийг хэвээр үлдээн, "COVID-19-ийн тархалт улс даяарх том асуудал болоод байх үед шүүгдэгчийн хэлсэн үг нь нийгэмд бүхэлд нь маш их нөлөөлсөн гэж үзсэн өмнөх шүүлтэд алдаа байхгүй" гэж мэдэгджээ.

Эх сурвалж: Japan Today

---