Туул голын "цэргүүд" албандаа гарлаа
Горхи-Тэрэлжийн БЦГХЗ-тай хамтран Тэрэлж голд үржлийн насны минж тавилаа. ОХУ, ХБНГУ-аас авчирсан минжний Монголд төрсөн дөрвөн дүдэр Туул голын экосистемийг байгалийн аргаар сайжруулах албандаа гарч байна.
Өсгөсөн минж маллагчид нь холын аянд хүүгээ мордуулж байгаа аав, ээж лугаа өдрийн хоол, хуучин хэвтрийг нь бэлдэж өгөн сүү өргөн ерөөл хэлсээр гунигтай үджээ.
Туул голын урсцыг тохируулах зорилгоор 2011 онд эхэлсэн минж нутагшуулах, үржүүлэх төслийн хүрээнд 24 минжийг байгальд тавьж, тус төвд 42 минж өсгөж байгаа юм байна.
Улаан номонд орсон минж бол усны инженер буюу гол, мөрний цэвэрлэгч юм. Тэд хэзээ ч загасаар хооллодоггүй гэдгийг мэдэх үү? Тэр утгаараа цаашид 150 тоо толгой минжтэй болоход байгалийн аясаараа өснө гэсэн судалгаа байгаа аж. Минж нутагшуулах нь Туул голын экосистемийн доройтлыг багасгах, голын экологийн нөхцөлийг байгалийн аясаар нь сэргээх, урсацыг нэмэгдүүлэх зэрэг ач холбогдолтой юм.
Минж нь мэрэгчдийн багт багтах амьтдын дотроос хамгийн том биетэй. Монгол улсын Улаан номонд багтсан ховор мэрэгчдийн нэг юм. Нас гүйцсэн минжний биеийн жин 16-22 килограмм, биеийн урт 74-86 сантиметр, сүүлний урт 25-30 сантиметр байдаг. Минж нь бүлийн зохион байгуулалтаар амьдардаг ба бүлийн бүтцэд эцэг, эх, нэг болон хоёр настай минжүүд багтдаг аж.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.