Зам тээвэр болон Эрүүл мэндийн яамны ТНБД нарыг томилов

Засгийн газрын өнөөдөр /2019.01.09/-ийн хуралдаанаар хэд хэдэн томилгоо хийсэн байна. Тодруулбал, Барилга хот байгуулалтын дэд сайдаар Б.Мөнхбаатарыг томилжээ. Б.Мөнхбаатар нь Баянзүрх дүүргийн Засаг дарга, Хотын орлогч байсан, Эрдэнэс Оюутолгойн Монгол дахь захиралаар тус тус ажиллаж байсан. Хамгийн сүүлд Нийслэлийн Засаг дарга бөгөөд Хотын даргад нэр дэвшиж байсан ч намын Удирдах зөвлөл дэмжигдээгүй юм.

Түүнчлэн өнөөдрийн Засгийн газрын хуралдаанаар Зам тээврийн хөгжлийн яамны Төрийн нарийн болон Эрүүл мэндийн яамны Төрийн нарийн бичгийн дарга нарыг томилсон байна. Эрүүл мэндийн яамны Төрийн нарийн бичгийн даргаар Клиникийн нэгдүгээр эмнэлгийн даргаар ажиллаж байсан Б.Бямбадорж ажиллахаар болжээ.

Мөн Хууль зүй, дотоод хэргийн дэд сайдаар Ганбатын Элбэгсайханыг томилсон байна. Тэрээр 2017 оноос Шүүхийн шийдвэр гүйцэтгэх ерөнхий газрын Тэргүүн дэд даргаар ажиллаж байсан юм.

Зам, тээврийн хөгжлийн яамны Төрийн нарийн бичгийн даргаар томилогдсон Сандагдоржийн Батболд нь 2016 оноос Зам, тээврийн хөгжлийн яамны Автотээврийн бодлогын хэрэгжилтийг зохицуулах газрын даргаар ажиллаж байжээ. 

Өнөөдрийн Засгийн газрын хуралдаанаар Самдангийн Энхбаатарыг Засгийн газрын хэрэгжүүлэгч агентлаг-Архивын ерөнхий газрын даргын албан тушаалд томилсон байна. С.Энхбаатар нь 2018 оны 6 дугаар сараас Засгийн хэрэгжүүлэгч агентлаг-Архивын ерөнхий газрын даргын үүргийг түр орлон гүйцэтгэгчээр ажиллаж байжээ.