Абу Дабигийн баялгийн сан Luckin Coffee компанид нэг тэрбум долларын хөрөнгө оруулав

Арабын Нэгдсэн Эмират Улсын Абу Дабигийн төрийн баялгийн сан болох "Mubadala Investment Company" БНХАУ-ын кофены томоохон сүлжээ "Luckin Coffee"-ийн цөөн хувьцааг стратегийн түвшинд худалдан авахаар тохиролцлоо.

Нийт нэг тэрбум ам.доллар буюу 7.8 тэрбум хонконг долларын өртөг бүхий уг хэлцлийг тус кофены сүлжээний хяналтын багцыг эзэмшигч хувийн хөрөнгө оруулалтын "Centurium Capital" пүүстэй түншлэн хэрэгжүүлж байна.

Хөрөнгө оруулалтын гэрээ батлагдсанаар "Mubadala" сангийн Хятад дахь хувийн хөрөнгө оруулалт хариуцсан захирал Филип Ифэй Бао "Luckin Coffee"-ийн удирдах зөвлөлд албан ёсоор томилогдлоо. "Mubadala"-гийн Азийн бүс нутаг хариуцсан захирал Мохамед Албадр Хятадын шинэхэн чанасан кофены зах зээл 7.2 тэрбум ам.доллароос давж, хурдацтай өсөж байгааг тэмдэглээд, энэхүү хэрэглээний салбарт урт хугацааны өндөр өсөлт харагдаж буйг онцолсон байна.

Өдгөө "Luckin Coffee" нь Хятадын эх газар болон Хонконгт 31 мянга орчим салбар ажиллуулж байгаагийн зэрэгцээ Сингапур, Малайз, Америкийн Нэгдсэн Улс зэрэг зах зээлд өргөжин тэлж, дэлхий даяар нийт 36 мянга орчим цэгт үйл ажиллагаа явуулж байгаа юм. 

Компанийн технологид суурилсан үйл ажиллагааны загвар, нийлүүлэлтийн сүлжээн дэх дата систем болон шинэ бүтээгдэхүүн зах зээлд богино хугацаанд нэвтрүүлдэг чадавх нь хөрөнгө оруулагчдын итгэлийг хүлээх гол хүчин зүйл болжээ.

Уг хөрөнгө оруулалт болон Сингапурын "Temasek" сангийн дэмжлэгт тулгуурлан "Luckin Coffee"-ийн ТУЗ-ийн дарга Дэвид Ли Персийн булан болон Ойрхи Дорнодын хэрэглээний зах зээлд нэвтрэх боломжийг идэвхтэй судалж буйгаа мэдэгдлээ. Энэхүү хамтын ажиллагаа нь Абу Дабигийн хилийн чанад дахь хөрөнгийг төрөлжүүлэх, газрын тосны бус эдийн засгийн харилцааг бэхжүүлэх болон Хятадын өндөр өсөлттэй хэрэглээний салбарт санхүүжилт төвлөрүүлэх зорилттой нийцэж байна.

Эх сурвалж:

• worldcoffeeportal.com

• facebook.com

• qsrmedia.asia

• gcrmag.com

• finance.biggo.com