ОХУ-ын Гамалейн судалгааны хүрээлэн хамрын цацлага хэлбэрийн коронавирусийн эсрэг вакцин боловсруулж байгаа бөгөөд тус улсын Эрүүл мэндийн яамнаас хоёрдугаар шатны эмнэлзүйн туршилтыг явуулах зөвшөөрлийг олгожээ.

Албаны мэдэгдлийн дагуу "Gam-COVID-Vac" хэмээн нэрлэсэн энэхүү бэлдмэлийг Санкт-Петербург хотын Эко аюулгүй байдлын шинжлэх ухааны судалгааны баазад турших ба нийт 500 насанд хүрсэн сайн дурын хүн хамрагдах аж.

Оросын Эрүүл мэндийн яамнаас энэ сарын 12-ны өдөр олгосон тус зөвшөөрөл нь 2023 оны 12 дугаар сарын 31-ний өдөр хүртэл хүчинтэй юм.

Гамалейн үндэсний судалгааны хүрээлэнгийн захирал Александр Гинцбургийн хэлснээр уг хамрын цацлага нь "Спутник V" вакцины хоёр дахь тунгийн бүрэлдэхүүн хэсгээс бүрдсэн бөгөөд клиник туршилтыг 2021 оны сүүлээр эхлүүлэн, 2022 он гэхэд албан ёсоор бүртгүүлэхээр төлөвлөж байгаа гэнэ.

Эх сурвалж: TASS

---