? LIVE: "Энхсаран" сувиллаас шүгэл үлээсэн иргэн Д.Мөнхбат хоёр хэрэгт буруутгагдан, жил гаруй шүүгдэж байна

Иргэн Д.Мөнхбат өнгөрсөн 2020 оны аравдугаар сард эх орондоо ирж, “Энхсаран” сувилалд тусгаарлагдаж байх хугацаандаа Covid-19 халдвар авсан. Тэрбээр сувиллын бодит нөхцөлийг олон нийтэд дамжуулж, мэдээлсэн юм.

Гэвч түүнд хуулийн байгууллагаас Зөрчлийн тухай хуулийн 5.13.1 дэх заалтаар торгох шийтгэл оногдуулсан байна. Түүнчлэн Эрүүгийн хуулийн 15.6.1 дэх хэсэг Бусдын амь насанд аюул учруулж болзошгүй халдварт өвчин бусдад халдаах эсхүл тархах нөхцөл бүрдүүлсэн гэх зүйл ангиар эрүүгийн хэрэг үүсгэж, яллагдагчаар татсан юм. 

Ард иргэдийг төөрөгдүүлсэн гэдэг үндэслэлээр 4-14 сая төгрөгөөр торгох эсвэл 6-36 сараар хорих ялтай хэрэгт яллагдагчаар татсан. Одоо эрүүгийн хэрэг үргэлжилж байгаа, прокурорын байгууллагаас шүүхэд шилжүүлсэн.

Миний хувьд эх орондоо ирсэн хугацаанд цагдаагийн газар, эмнэлгээс огт салсангүй. Ажил хийх ямар ч боломж ч олдохгүй. Эрүүл мэндээс гадна сэтгэл зүйн дарамтад байлаа. Монголд хүний сэтгэл зүйн хохирол гэдгийг ерөөсөө авч хэлэлцдэггүй.

Анх цар тахал эхэлж байхад гадаадаас ирсэн иргэдийг 21 хоног тусгаарлах байранд байлгаж, тэндээсээ гараад гэртээ 14 хоногийн тусгаарладаг байсан. Гэтэл одоо улсын хэмжээнд улаан бүс болсон хэрнээ халдвартай иргэдийг долоо хоног тусгаарлаж, гэртээ дөрөв хоног өөрийгөө тусгаарлах шаардлагыг тавьж байна. Ийм шийдвэр гаргаж болох байсан бол яагаад тухайн үед нь иргэдээс олон хоногийн тусгаарлалтын төлбөр авсан юм бэ.

Намайг 21 хоног тусгаарлалт дууссан байхад өрөөнөөс гарч лайв хийхэд яллагдагчаар татсан зүйл анги заалтыг хараарай. Дарга нарын зохион байгуулсан ажлыг хараарай...