Байгаль дэлхий анхны төрхөө үгүйлэв үү?

Дэлхий дээр хуурай газар үүсч, ан амьтан хүн төрөлхтөн бий болохоос ч өмнө бүхэлдээ далайн тэнгисээр бүрхсэн байсан гэж эрдэмтэд үздэг.

Далайн ус ширгэж энд тэнд хуурай газар бий болсноор өөр өөр хэл соёл хөгжиж дэлхийн улс орнууд газар нутгийн байрлалаараа хуваагдан оршсон.

Гэтэл сүүлийн үед жижиг арлууд далайд живж, хуурай газар багассаар байгааг эрдэмтэд онцолж байна.

Америкийн Үндэсний далай тэнгис, уур амьсгал судлах холбооноос далай тэнгисийн хуурай газрыг сорж бүрхэх үйл явц 2014 оноос хойш 60 хувиар нэмэгдсэн гэдгийг судалж тогтоожээ.

Хуурай газар далайд живэх үйл явцын 90 хувь нь дэлхийн дулаарлаас үүдэлтэй байна.

“Далай тэнгисийн уур амьсгал дулаарахын хэрээр хар салхи, далайн шуургууд улам хүчирхэгжиж усан доорх амьдралыг сүйтгэж байна” гэж уг судалгааг хийсэн эрдэмтэн Лайре Респланди хэлжээ.

Үүнээс долоо хоногийн өмнө НҮБ “хүн төрөлхтөн дэлхийн гамшигт сүйрлийн эхлэл байж болох дулаарлаас зугтах, түүнтэй тэмцэхэд 10 жил л үлдлээ. Тиймээс улс орон бүрийн Засгийн газар нэн даруй цаг уурын өөрчлөлттэй тэмцэх арга хэмжээг авч хэрэгжүүлэх хэрэгтэй” хэмээн уриалав.

НҮБ 2030 он гэхэд дэлхийн цаг уурын жилийн дундаж хэмжээ цельсийн 1,5 хэмээр дулаарч ган гачиг, ойн түймэр, үер усны аюул, хүнс тэжээлийн хомсдол олон зуун сая хүнийг нэрвэж болзошгүй нөхцөл байдал үүссэнийг хатуу анхааруулжээ.

Тэр үед хүн төрөлхтөн одоогийнхоос 150 дахин их эрчим хүч үйлдвэрлэх шаардлагатай болох аж.

Хэрэв тийм бол 2100 онд юу болох вэ…

Эх сурвалж: www.cnn.com