Ганцаараа хооллох хандлага нэмэгдэж, рестораны эздийн санал хуваагдаж эхлэв
Зоогийн газрын салбарт ганцаараа хооллох хандлага түүхэн дээд хэмжээнд хүрч, үйлчилгээний байгууллагуудын эздийн дунд хуваагдмал байдал үүсгээд байна.
"Yum! Brands" компанийн тайланд дурдсанаар нийт хооллох тохиолдлын 47 хувийг ганцаараа үйлчлүүлэгчид эзэлж байгаа нь 2021 онтой харьцуулахад огцом өссөн үзүүлэлт юм.
Уг өөрчлөлтийн зонхилогч хүч нь "Z" болон Миллениал үеийнхэн бөгөөд тэдний бараг 50 хувь нь долоо хоног бүр ганцаараа хооллодог ажээ. "CNN" агентлагийн мэдээлснээр нийт америкчуудын 29 хувь нь тогтмол ганцаараа зоогийн газарт очдог байна.
Хэдийгээр нэг хүн ширээ эзэлдэг ч "OpenTable" платформын тоо баримтаас үзэхэд тэд энгийн үйлчлүүлэгчээс 48 хувиар илүү мөнгө зарцуулдаг. Эдгээр тохиолдлын талаас илүү хувь нь өөртөө анхаарал халамж тавих зорилготой "дээд зэрэглэлийн мөч" байдаг бөгөөд нэг удаад 10-30 гаруй ам.долларыг зөвхөн өөртөө зориулан зарцуулдаг байна.
Гэвч худалдан авах чадвар өндөр байгааг үл харгалзан зарим зоогийн газрууд эдийн засгийн дарамт, ширээний эргэлтээс шалтгаалан ганцаараа ирсэн хүмүүст үйлчлэхээс татгалзах болжээ.
Тухайлбал, оргил ачааллын үед нэг хүнийг оруулахгүй байх, Барселона зэрэг аялал жуулчлалын бүсүүдэд 45 минутын хугацааны хязгаарлалт тогтоох, эсвэл доод тал нь захиалах ёстой үнийн дүнгийн босго тавих зэрэг арга хэмжээ авч байна. Саяхан нэгэн ресторанд "Бид ганцаардлыг зардаггүй. Ганцаараа битгий ир" гэсэн бичиг байрлуулсан нь цахим орчинд ихээхэн шүүмжлэл дагуулсан бөгөөд Их Британийн Манчестер хотын нэгэн уушийн газар оройн 21:00 цагаас хойш ганц хүн оруулахыг хориглосон шийдвэр гаргажээ.
Нийгэмд "Ганц хүний ширээ" хэмээх тренд эрчимжихэд хэд хэдэн хүчин зүйл нөлөөлж байна. Үйлчлүүлэгчдийн 34 хувь нь үүнийг өөртөө зарцуулах цаг буюу "Me time" гэж тайлбарлаж байгаа бол зайнаас ажиллах хэв маяг нь гэрийн оффисоос гарах шалтгаан болж байна.
АНУ-д ганц бие өрхийн тоо 28 хувьд хүрсэн нь үүнийг зүгээр нэг амьдралын хэв маягийн сонголт бус, нийгмийн бүтцийн томоохон өөрчлөлт болохыг харуулж байна.
Зарим бизнес эрхлэгчид шинэ урсгалыг эсэргүүцэж байгаа ч алсын хараатай зоогийн газрууд хэдийнэ дасан зохицож эхэлжээ. Тэд том ширээг сул байлгахгүйн тулд баарны суудал, нэг хүний зориулалттай ширээ нэмэх зэргээр интерьерийн шийдлээ өөрчилж байна. Түүнчлэн өндөр зэрэглэлийн ресторанууд ганцаараа яваа хүмүүст зориулсан тусгай цэс, хундагаар зарах дарсны хөтөлбөр зэргийг нэвтрүүлж байгаа нь цаашид үйлчилгээний салбар энэхүү шинэ хүн ам зүйн өөрчлөлтөд бүрэн нийцэх шаардлагатайг харуулж байна.
Эх сурвалж:
• says.com
• time.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.