22 сая хүн амтай Мехико хот маш хурдацтайгаар живж байна
2026 оны тавдугаар сарын эхээр нийтлэгдсэн НАСА-гийн хиймэл дагуулын шинэ мэдээллээр Мехико хот маш хурдацтайгаар доошилж, живж байгааг тогтоолоо.
Сансраас тод харагдах хэмжээний энэхүү өөрчлөлтийн дүнд тус хот жилд дунджаар 24-25 сантиметрээр доошилж байгаа бөгөөд дэлхийн хамгийн хурдан живж буй нийслэлүүдийн нэг болоод байна.
АНУ болон Энэтхэгийн сансар судлалын байгууллагуудын хамтран 2025 оны долоодугаар сард хөөргөсөн "NISAR" хиймэл дагуул дээрх хэмжилтийг хийжээ. Уг төхөөрөмж нь үүл, цаг агаарын нөхцөлөөс үл хамааран өдөр, шөнийн аль ч үед газрын гадаргуугийн миллиметрийн түвшний хөдөлгөөнийг хянах чадвартай юм.
2025 оны аравдугаар сараас 2026 оны нэгдүгээр сарын хооронд буюу хуурай улирлын үед цуглуулсан мэдээллээс үзэхэд хотын зарим хэсэг сард 2 см доошилж байгаа бол хамгийн их өртсөн бүсүүдэд сард 1.98 см хүртэл суулт өгчээ. Өнгөрсөн нэг зууны хугацаанд нийслэл хотын газрын хөрс 12 гаруй метрээр доошилсон түүхтэй.
Гамшигт үзэгдлийн гол шалтгаан нь хотын газарзүйн онцлог болон хүний үйл ажиллагаатай шууд холбоотой. Ойролцоогоор 20-22 сая хүн амтай Мехико хот нь эртний Текскоко нуурын ширгэсэн ёроол дээр баригдсан байдаг. Ундны усны асар их хэрэгцээг хангахын тулд газар доорх уст давхаргыг олон арван жилийн турш эрчимтэй шавхсаны улмаас нуурын ёроолын шаварлаг хөрс нягтаршиж, шахагдах нөхцөл бүрджээ. Түүнчлэн тэнгэр баганадсан барилгуудын асар их жин, уур амьсгалын өөрчлөлтөөс үүдэлтэй ган гачиг зэрэг нь уст давхаргыг нөхөгдөх боломжгүй болгож, байдлыг улам хүндрүүлж байна.
Газрын гадаргуугийн суулт нь хотын дэд бүтэц, түүхэн дурсгалт газруудад ноцтой хохирол учруулж эхэлснийг Мексикийн Үндэсний Өөртөө Засах Их Сургуулийн (UNAM) геофизикчид анхаарууллаа. Хөрсний суултын улмаас авто зам цуурч, ус болон бохирын шугам хоолой хагарч, хотын метроны сүлжээнд гэмтэл гарч байна.
Мөн Бенито Хуаресын олон улсын нисэх онгоцны буудал хамгийн их суулттай бүсэд оршиж байгаа бол 1910 онд баригдсан Тусгаар тогтнолын сахиусан тэнгэрийн хөшөөний сууринд газрын суултыг нөхөхийн тулд 14 нэмэлт шат хийх шаардлага гарчээ. Үүнээс гадна 1573 онд баригдаж эхэлсэн Метрополитан цогчин дуган зэрэг хуучны барилгууд нүдэнд харагдахуйц хазайж, цуурч байна.
НАСА болон орон нутгийн эрдэмтдийн дүгнэж байгаагаар газар доорх уст давхаргын ширгэлт нь зөвхөн хотын барилга байгууламжийн бүтцэд заналхийлээд зогсохгүй, цэвэр усны хямралыг өдөөж байна. Хэрэв энэ байдал цаашид үргэлжилбэл мегаполис хот усны нөөцгүй болох буюу цоргоноос ус гарахгүй болох "тэг өдөр"-тэй нүүр тулах аюултай түвшинд хүрчээ.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.