?LIVE: Эхний ээлжид 6100 тн тэжээлийг малчдадаа хүргэнэ

Улсын онцгой комиссын шуурхай штабаас цаг үеийн нөхцөл байдалтай холбоотой мэдээлэл хийв.

ОБЕГ-ын дэд дарга, бригадын генерал Б.Ууганбаяр: 

-Манай улсад сүүлийн 72 цагийн хугацаанд байгалийн онц аюултай цаг агаарын үзэгдэлтэй холбоотойгоор нөхцөл байдлын мэдээлэл өгье.

Гал түймрийн 20 дуудлага ирсэн. Сураггүй болсон 27 дуудлага ирсэн. 50 иргэн төөрч сураггүй болсны 49 иргэнийг эсэн мэнд олсон. Харин нэг иргэн харамсалтайгаар нас барсан байдалтай олдсон.

Цасанд суусан гэх 43 гаруй дуудлага мэдээлэл бүртгэгдсэн. Ингээд мэргэжлийн байгууллагууд хамтран ажилласны үр дүнд 147 машин 582 зорчигчийг аюулгүй байдал амь насыг нь авран хамгааллаа. Мөн голын мөс цөмөрсөн нэг дуудлага ирсэн.

Хүчтэй салхи шуурганы улмаас хоёр гэр, таван байшингийн дээвэр, 30 хашаа, долоон машины шил хагарсан гэж бүртгэгджээ. Уулны цасны нурангид дарагдсан нэг дуудлага бүртгэгдсэн. Эрлийн ажиллагаа зохион байгуулж нэрвэгдсэн иргэний цогцыг олсон. Том хэмжээний цасан нуранги үүссэн байсан гэдгийг энд нэмж хэлье.

Улсын хэмжээнд нийт нутгийн 80 гаруй хувьд цасан бүрхүүл тогтоод байна.

Эхний ээлжинд 6100 тонн хивгийн малчин иргэддээ хүргэнэ. 

Цаг уурын байгууллагаас энэ сарын 10-ны байдлаар гаргасан зудын үнэлгээгээр 20 аймгийн 190 сум, нийслэлийн хоёр дүүрэгт нөхцөл байдал хүндрээд байна.

Засгийн газраас хаваржилт хүндэрч, зудын байдалтай болсонтой холбогдуулж, өнгөрсөн долоо хоногт гамшгаас хамгаалах өндөржүүлсэн бэлэн байдлын зэрэгт шилжүүлсэн.

Тэгвэл хаваржилт хүндэрсэн аймаг, сумдад хүргэх өвс, тэжээл ачсан цуваа өнөөдөр хөдөлж байна. 

Засгийн газрын шийдвэрээр хаваржилт хүндэрсэн аймгуудад тусламж үзүүлэх Шуурхай бүлгүүдийг байгуулсан, сайд нар ахлан ажиллаж буй. Шуурхай бүлгүүд нь өвс тэжээл, түлш шатахуун, хоол хүнсний тусламж үйлчилгээг үзүүлэхээс гадна хаагдсан зам давааг нээх, зам гаргах зэрэг ажлыг гүйцэтгэнэ. 

138 машин механизм, 300 албан хаагч үүрэг гүйцэтгэж 14 мянган малчин өрхөд үйлчилж ажиллана гэдэг тооцоолол гаргаад байна гэв.