БИЧЛЭГ: Норвегийн алуурчин шүүх хурлын үеэр нацист мэндчилгээ үйлджээ
Норвегид 2011 оны 7 дугаар сард 77 хүний аминд хүрсэн Андерс Беринг Брейвик арав гаруй жил торны цаана суусны эцэст хугацаанаасаа өмнө суллагдах эсэхийг шийдэх шүүх хурлын эхэнд тэрээр нацист мэндчилгээ үзүүлжээ.
Хэт барууны үзэлтэй Брейвик нь Норвегийн энх тайвны үеийн хамгийн аймшигтай, харгис хэрцгий аллагыг үйлдсэн хэргээр 21 жилийн хорих ял эдэлж байгаа билээ.
Тэрээр Осло хотын нэгэн автомашинд тэсрэх бөмбөг суурилуулан, дэлбэлж, найман хүнийг хөнөөснийхөө дараа 69 хүнийг буудан хороосны ихэнх нь өсвөр насны хүүхэд байсан юм.
Тэгвэл өнгөрөгч мягмар гарагт шүүх танхимд орж ирэхдээ Брейвик цагаан арьстнуудын ноёрхлыг дэмжиж буйгаа илэрхийлсэн дохиог хуруугаараа үзүүлээд, нацист мэндчилгээ үйлдсэн байна. Тэрээр мөн "Манай цагаан арьст үндэстний эсрэг геноцидээ зогсоо", "Нацист-Иргэний дайн" гэх бичгүүдийг хэвлэн, барьсан байжээ.
Андерс Брейвик шүүгчид хандан үг хэлэхдээ, өөрийнхөө үйлдсэн гэмт хэргүүдийг хэт барууны үзэлтэй хэт даврагчдын цахим сүлжээтэй холбон тайлбарлаж, энэ нь түүнийг халдлага үйлдэхэд нөлөөлсөн гэж мэдүүлсэн аж.
Тэрээр "Тэд миний тархийг угаасан. Бидэнд Гуравдугаар Рейхийг дахин тогтоох тушаал өгсөн бөгөөд үүнийг хэрхэн гүйцэтгэх нь цэрэг бүрийн шийдвэр байсан" хэмээн ярьсан юм.
Гэвч Брейвик цагаан арьст хүмүүс болон нацистуудын ноёрхлын төлөөх тэмцлээ энхийн замаар үргэлжлүүлнэ гэж мэдэгджээ.
Эх сурвалж: Reuters
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.