Умард Солонгос Ковид-19-ийн вакцин хүлээж авахаас татгалзав
Дэлхий ядуу буурай улс орнуудад вакцин түгээх Ковакс хөтөлбөрийн хүрээнд БНАСАУ-д БНХАУ-д үйлдвэрлэсэн Синовак вакцины гурван сая тунг хүлээлгэж өгөхөөр болсон. Гэвч Умард Солонгосын зүгээс вакцины уг тусламжийг хүлээж авахаас татгалзсан байна.
НҮБ-ын мэдээлж байгаагаар Умард Солонгос улс Ковакс хөтөлбөрийн хүрээнд тараагдаж буй гурван сая тун вакциныг цар тахлын нөхцөл байдал илүү хүнд байгаа бусад улс орнуудад хуваарилах хүсэлт гаргажээ. Учир нь дэлхий дахинд Ковид-19-өөс урьдчилан сэргийлэх вакцины хомсдол нүүрлээд байна хэмээн тайлбарлажээ.
Тус улс анх удаа олон улсын вакцины тусламж хүлээж авахаас татгалзсан явдал биш. Өнгөрсөн долдугаар сард АстраЗенека вакцины хоёр сая тун, ОХУ-ын Спутник вакциныг хүлээж авахаас татгалзсан. Коронавирусийн эсрэг вакцины үр нөлөөнд эргэлзэж байгаагаа ч илэрхийлсэн.
ДЭМБ-ын наймдугаар сарын 19-ний өдөр өгсөн мэдээллээр БНАСАУ-д коронавирусийн халдварын тохиолдол илрээгүй. Тус улсын эрүүл мэндийн салбарын ажилчид болон томуу төст өвчний шинж тэмдэг илэрсэн нийт 37,291 хүнд шинжилгээ хийхэд коронавирус илрээгүй гэжээ.
Умард Солонгосын хувьд цар тахал эхэлсэн даруйд хатуу арга хэмжээ авч хэрэгжүүлсэн. Өнгөрсөн жилийн нэгдүгээр сард хилээ хаасан цөөн улсуудын нэг юм.
Эх сурвалж: ВВС
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.