TREND LIVE: МИАТ-ийн Хэлтсийн дарга С.Батсүх юуны учир ажилтнаа яргалав

“Монголын иргэний агаарын тээвэр” ТӨХК-ийн хэлтсийн даргаар 2016 оны арванхоёрдугаар сарын 20-оос эхлэн өнөөдрийг хүртэл ажиллаж буй Сандуйжавын Батсүх “Чингис хаан” ОУНБ-ын хоёрдугаар давхарт ажилтнаа банзаар зодож, яргалж буй бичлэгийг TREND LIVE онцолж байна.

Уг бичлэг хэзээ хийгдсэн нь одоогоор тодорхойгүй байгаа хэдий ч уг яргаллын нууцаар бичсэн эмэгтэй өөрийн эрхгүй дуу алдан уйлах чимээ тод сонсогдсон нь олны сэтгэлийг сэртхийлгэлээ. Энэ бичлэг МИАТ ТӨХК-ийн ажилтнуудын дундын фэйсбүүк группэд анх нийтлэгдсэнээр ийнхүү олны анхаарлын төвд орлоо.

Бид уг асуудлыг цагдаагийн байгууллага шалгаж эхэлсэн эсэхийг ЦЕГ-ын Хэвлэл мэдээллийн төвөөс тодруулахад “МИАТ-ийн хэлтсийн дарга ажилтнаа зодож буй бичлэгийг саяхан үзлээ. Энэ асуудлыг шалгаж тодруулаад олон нийтэд мэдээлнэ” гэв.

Харин уг асуудалтай холбогдуулан МИАТ ТӨХК-аас гаргасан мэдэгдэлдээ "Цахим орчинд тархаад буй МИАТ ТӨХК-ийн Зорчигч үйлчилгээний хэлтсийн дарга С.Батсүхийн ажилтантайгаа зүй бус харьцаж буй үйлдэлд хариуцлага тооцож ажлаас нь чөлөөлж, хуулийн байгууллагаар шалгуулахаар шилжүүлж байгааг мэдэгдэж байна" гэжээ.