“IKEA” 7,500 ажилтнаа цомхотгохоор боллоо

Шведийн тавилга үйлдвэрлэгч IKEA брэнд дэлхий дээр 160,000 ажилтантай. Эдгээрийн таван хувь буюу 7,500 ажилтнаа цомхотгох болсноо мэдэгджээ.

2020 он гэхэд цомхотгож дуусах ажилтнуудын ихэнх нь албан өрөөнд суудаг мэргэжилтнүүд байх юм. Орчин үеийн цахим өөрчлөлтийг дагаж бүтэц зохион байгуулалтаа шинэчлэхээр болжээ. Тус компани цахим худалдаанд түлхүү анхаарч, хотын төвүүд дэх дэлгүүрүүдээ жижгирүүлэхээр төлөвлөсөн байна.

“Ингка холдинг”-ийн охин компани болох IKEA тавилгын брэнд дэлхийн 30 гаруй оронд 367 салбартай. “Ингка холдинг”-ийн худалдааны менежер Толга Онкугийн ярьснаар “Бид зах зээлтэйгээ уялдаж ажиллах хэрэгтэй учраас орон тооны цомхотгол хийхээр болсон” гэжээ.

Цомхотгол бүх салбаруудад явагдах ч дэлгүүр болон түгээлтийн газруудыг тойрон өнгөрнө. Мөн ирэх хоёр жилийн хугацаанд дижитал цахим орчинд ажиллах чадвартай 11,500 хүн шинээр ажилд авч цусаа сэлбэн, 30 шинэ дэлгүүр нээхээр төлөвлөжээ.

“Ингка холдинг” 2017-2018 оны хооронд 54 тэрбум ам.долларын худалдаа эрхэлсэн нь өмнөх оноос хоёр хувиар өссөн үзүүлэлт байна. Түүнчлэн өмнөх оноос гурван хувиар их буюу 838 сая зочин угтаж авсан гэжээ. Дэлхийн хүн амын бараг 1/3 нь буюу 2,4 тэрбум хүн IKEA вэб хуудастай танилцсан байдаг байна.

Эх сурвалж: www.straitstimes.com