БИЧЛЭГ: “Чам руу хар тамхи хаяахад л чи таван жил шоронд сууна” гэж сүрдүүлжээ
ОХУ-ын Москва хотын нэгэн иргэнийг тус улсын Үндэсний харуул нар гэрт нь хар тамхи хаян, хэрэг тохно хэмээн сүрдүүлсэн явдал гарчээ.
Олон нийтийн сүлжээгээр тархаад буй уг хэргийн бичлэг дээр Оросын Үндэсний харуулын дүрэмт хувцас өмссөн хоёр эрэгтэй уг иргэний гэрт хар тамхи хаян, шоронд таван жилийн турш амархаан суулгаж чадна хэмээн сүрдүүлжээ.
Үндэсний харуул: Шоронд орохыг хүсэж байна уу?
Эрэгтэй: Яасан гэж?
Үндэсний харуул: Би яг одоо чам руу хар тамхи хаяад л чи таван жил шоронд сууна. Хүсэж байна уу? Тийм л амархан.
Александр гэх уг эрэгтэйн хөрш Дмитрийн хэлснээр зургадугаар сарын 6-ны өдөр Александр хөгжим сонсож байсан бөгөөд 17:00 цагийн үед нэгэн хөрш эмэгтэй нь түүнийг хөгжмөө унтраахыг шаардсан байна. Александр татгалзахад хөрш эмэгтэй цагдаа дууджээ. Гэвч удалгүй цагдаагийн оронд Үндэсний харуулууд ирээд, Александрыг заналхийлж эхэлсэн байна. Ингээд тэрээр үйл явдлыг камераар бичин, цахим ертөнцөд дэлгэжээ.
Оросын үндэсний харуулаас эдгээр хоёр ажилтныг хэн болохыг олж тогтоосон ба зохих хариуцлагыг хүлээлгэсэн хэмээн мэдэгдсэн байна.
Харин Дмитрийн мэдээлснээр дараа өдөр нь үл мэдэгдэх байгууллагын энгийн хувцастай ажилтнууд Александрын гэрт ирээд, энэхүү бичлэгийг “чимээгүйхэн” устгахыг хүссэн гэнэ. Хэдий Александр тэдний хүссэний дагуу бичлэгийг устгасан боловч Дмитрий нөхцөл байдлыг олон нийтэд мэдээлэхийг хүссэн байна.
Эх сурвалж: tjournal.ru
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.