🔴С.Баярцогт: Х.Баттулга бид хоёр цаашдаа хэн хэндээ буулт хийгээд явахад асуудал байхгүй

УИХ-ын гишүүн С.Баярцогт Оюутолгойн төслийн ач холбогдол, ил тод байдал болон намын дотоод улс төрийн нөхцөл байдлын талаар мэдээлэл өглөө. 

АН-ын ЕНБД-ын үүргийг түр орлон гүйцэтгэгч С.Баярцогт:

-Оюутолгой төслийг хэрэгжүүлсэн хүмүүс Монголын бахархал байх ёстой гэж үзэж байна. Энэ төсөл нь Монгол Улсын Үндэсний аюулгүй байдлын үзэл баримтлалд заасан гуравдагч хөршийн бодлогыг бодитоор хэрэгжүүлж, эдийн засгийн тусгаар тогтнолыг баталгаажуулах гол хөшүүрэг болсон. Манай улс Орос, Хятад гэсэн хоёр их гүрний дунд оршдог учраас гадаад худалдаа, хөрөнгө оруулалтын 40 хувийг гуравдагч хөрштэйгөө хийж байж хөгжлийн тэнцвэр хангагдана.

Оюутолгой нь Монгол Улсын хамгийн том татвар төлөгч, ажил олгогч төдийгүй олон жижиг, дунд үйлдвэрлэлийг дагуулж хөгжүүлж байгаа. Тавантолгойн гэрээнүүд нууцад байдгаас үүдэн эрх мэдэлтнүүдийн хууль бус үйлдэл гарах талбар болсон. Харин Оюутолгойг эзэмшигч компани олон улсын хөрөнгийн бирж дээр бүртгэлтэй байдаг тул бүх үйл ажиллагаа, хөрөнгө оруулалт нь нээлттэй, ил тод байдгаараа компанийн сайн засаглалын үлгэр жишээ болж байгаа.

МоАХ фракцын тэргүүн Х.Баттулгатай бидний дунд хувь хүний хувьд хурцадмал дайсагнал байхгүй. Хамтран ажиллахад тухайн үеийн нөхцөл байдал тохиромжгүй байсан. Хэрэв намдаа өндөр албан тушаал хашиж, намын ялалтын төлөө ажиллах нөхцөл бүрдвэл хоёр талаасаа буулт хийж, зөвшилцөж чадна.

Миний улс төрийн туршлагын хувьд 1998, 2004, 2008, 2014 онуудын Засгийн газрын гэрээ хэлэлцээрүүд, ОУВС-гийн хөтөлбөр, ОХУ-ын өрийн хэлэлцээр зэрэг дотоод, гадаадын олон чухал хэлэлцээрийг амжилттай ахалж байсан. Хэлэлцээр хийж байсны хувьд үндэслэн намын дотоод зөрчил, үл ойлголцлыг богино хугацаанд шийдвэрлэж чадна гэдэгтээ итгэлтэй байгаа. Харин Ерөнхийлөгчийн сонгуульд нэр дэвших эсэх асуудлаар одоогоор ямар нэгэн төлөвлөгөөгүй байгаа. Энэ удаагийн сонгуулийн үр дүн гарсны дараа илүү дэлгэрэнгүй мэдээлэл өгнө гэв.