🔴LIVE: Засгийн газрын хуралдаанаас гарсан шийдвэрийг танилцууллаа

Засгийн газрын ээлжит хуралдаанаар эрчим хүчний салбарын засаглалыг сайжруулах, үр ашгийг нэмэгдүүлэх болон Үндэсний баялгийн сангийн тухай хуулийн хэрэгжилтийг эрчимжүүлэх асуудлыг хэлэлцлээ. Хуралдаанаас эрчим хүчний үнэ тарифыг нэмэхээс урьтаж, салбарын засаглалыг сайжруулах, үр ашгийг нэмэгдүүлэх, зардлыг танах чиглэлд онцгой анхаарах үүргийг Ерөнхий сайд холбогдох албаныханд өглөө.

-Эрчим хүчний салбарыг санхүү, эдийн засгийн хувьд бие даасан, иргэдэд ээлтэй, шинэ технологи нэвтэрсэн салбар болгохын тулд дорвитой шинэчлэл хийхээр төлөвлөж байна. Энэ хүрээнд өвөлжилтийн бэлтгэлийг хангах зорилгоор хувийн хөрөнгө оруулалттай Сэлэнгийн 70 МВт-ын дулааны цахилгаан станцыг хугацаанд нь ашиглалтад оруулах, БНХАУ-аас эрчим хүч импортлох цахилгаан дамжуулах шугам, дэд станцын ажлыг шуурхайлахыг даалгав. Мөн оргил ачааллын үед цахилгаан хязгаарлахгүйн тулд батарей хуримтлуурыг богино хугацаанд нэвтрүүлэх, таван аймагт нарны цахилгаан станц барих ажлыг нээлттэй сонгон шалгаруулалтаар яаралтай эхлүүлэхээр шийдвэрлэлээ.

Эрчим хүчний үйлдвэрлэл, дамжуулалт, түгээлтийн өртөг зардлыг хамгийн багадаа 3 хувиар бууруулах зорилт тавьсан бөгөөд үүний тулд бүтцийн өөрчлөлт, орон тооны оновчлол хийж, үргүй зардал болон хулгайг таслан зогсоох юм. Түүнчлэн хэрэглэгч төвтэй ухаалаг систем нэвтрүүлж, иргэд гар утасныхаа аппликэйшнээр төлбөрийн мэдээллээ ил тод харах боломжийг бүрдүүлнэ. Мөн дулааны тоолууржуулалтын ажлыг энэ оны гуравдугаар улиралд багтаан эхлүүлэх бөгөөд одоогийн байдлаар нийт орон сууцны 53 хувьд шууд тоолуур тавих боломжтой байна. Цаашид шинээр баригдах барилгын норм дүрэмд дулааны тоолуур суурилуулах шаардлагыг заавал тусгахаар Барилга, хот байгуулалтын сайдад үүрэг болголоо.

Хуралдаанаар хэлэлцсэн дараагийн чухал асуудал нь стратегийн ач холбогдолтой ашигт малтмалын ордуудад төрийн эзэмшлийн хувь хэмжээг тогтоох хэлэлцээрийн явц байв. Нийт 16 ордод үйл ажиллагаа явуулж буй 25 аж ахуйн нэгжтэй хэлэлцээ хийх шаардлага үүссэнээс 14 компанитай уулзалт зохион байгуулжээ. Үүний үр дүнд "Энержи ресурс", "Хангад эксплорэйшн", "Өсөх зоос", "Ачит ихт" зэрэг дөрвөн компанитай урьдчилсан байдлаар санамж бичиг байгуулж, төрийн эзэмшлийн 34 хувийг үнэ төлбөргүй эзэмших, ордын ашиглалтын үр өгөөжийн 60 хувийг ард түмэнд хүртээх зарчмыг харилцан тохиролцсон байна.

Гэвч бусад аж ахуйн нэгжүүд хэлэлцээнд идэвхгүй оролцож, шаардлагатай тайлан мэдээллийг ирүүлэхгүй байх, техник эдийн засгийн үндэслэлээ шинэчлээгүй зэрэг хүндрэл гарч байна. Иймд иргэдийн хүртэх өгөөжийг бодитоор нэмэгдүүлэх, хөрөнгө оруулагчдад ойлгомжтой нөхцөл бүрдүүлэхийн тулд бие даасан хуулийн төслийг нэн яаралтай боловсруулж, Засгийн газрын хуралдаанд танилцуулахыг холбогдох албаныханд даалгалаа.

Үндэсний баялгийн сангийн тухай хуулийн хүрээнд байгуулагдсан Хуримтлалын санд 2024 онд 495.6 тэрбум, 2025 онд 507.1 тэрбум, 2026 онд 448.7 тэрбум төгрөг буюу нийт 1.4 их наяд орчим төгрөг төвлөрөх тооцоолол гарчээ. Энэхүү орлогыг иргэдийн нэрийн дансанд тэгш хуваарилах бөгөөд 2025 оны эцэс гэхэд нэг иргэнд 306 мянган төгрөг, 2026 оны эцэс гэхэд 500 мянган төгрөгийн хуримтлал үүсэх боломжтой юм. Стратегийн ордуудын хэлэлцээ амжилттай болж, төрийн эзэмшлийн хувь хэмжээг тусгай АМНАТ-өөр орлуулах хувилбарыг хэрэгжүүлснээр иргэдийн хүртэх хуримтлалын хэмжээ цаашид улам өсөх нөхцөл бүрдэнэ.