БИЧЛЭГ: Юнайтед Эйрлайнс компанийн онгоц газардах үедээ ачааны машин мөргөжээ
Италийн Венец хотоос АНУ-ын Нью-Жерси мужийн Ньюарк Либерти олон улсын нисэх онгоцны буудалд газардаж байсан "Юнайтед Эйрлайнс" компанийн 169-р нислэгийн Боинг 767-400 загварын онгоц хурдны зам дээгүүр хэт доогуур нисэж, ачааны машин болон гэрлэн дохионы шон мөргөсөн ноцтой осол гарлаа.
2026 оны тавдугаар сарын 3-ны өдрийн 13:58 цагийн орчимд цагт 250 орчим кмц-ийн хурдтайгаар газардаж байсан тус онгоц мөргөлдөөний дараа нислэгийн зурваст аюулгүй газардаж чадсан байна.
Ослын үед агаарын хөлөгт нийт 231 хүн буюу 221 зорчигч, багийн арван гишүүн зорчиж явсан бөгөөд тэдний хэн нь ч бэртэж гэмтээгүй байна. Харин онгоцны буух дугуйнд салхины шилээ хага цохиулсан ачааны машины жолооч Уоррен Бордли шилний хэлтэрхийд гар болон шуугаа зүсүүлж, хөнгөн бэртэл авчээ. Тэрээр орон нутгийн эмнэлэгт хүргэгдэн эмчлүүлээд эмнэлгээс гарсан байна. Мөн онгоцонд мөргүүлж унасан гэрлийн шонд өөр нэгэн жийп машин өртсөн ч жолооч нь гэмтэлгүй өнгөрчээ.
Нисэхийн мэргэжилтнүүд энэхүү ослын шалтгааныг цаг агаарын таагүй нөхцөл байдал болон нислэгийн зурвасын сонголттой холбон тайлбарлаж байна. Тухайн өдөр хүчтэй салхитай байсны улмаас нислэгийн хөдөлгөөний удирдлагаас онгоцыг ердийн урттай зурвасуудаас өөрчилж, Ньюаркийн хамгийн богино буюу 2000 орчим метр урттай 29-р зурваст газардах чиглэл өгчээ. Энэхүү зурвас нь хурдны замтай хамгийн ойр байрладаг тул аюулгүйн зай багатай байсан нь осол гарах гол нөхцөл болсон байж болзошгүй юм.
Агаарын хөлөгт их хэмжээний хохирол учирсан тул АНУ-ын Тээврийн аюулгүй байдлын үндэсний зөвлөлөөс (NTSB) уг үйл явдлыг албан ёсоор "осол" хэмээн бүртгэж авсан байна. Нислэгийн хөдөлгөөний удирдлагын аудио бичлэг болон ослын дараах гэрэл зургуудаас үзэхэд онгоцны их биеийн хажуу хэсэгт том нүх гарч цоорсон байжээ. Холбооны нисэхийн удирдлагын газар болон Тээврийн аюулгүй байдлын үндэсний зөвлөл хамтран ослын шалтгааныг тогтоох мөрдөн шалгах ажиллагааг эхлүүлээд байна.
Мөрдөн байцаагчид "Юнайтед Эйрлайнс" компаниас нислэгийн мэдээлэл бүртгэгч болон нисгэгчийн бүхээгийн дуу хураагуурыг гаргуулан авч, нислэгийн багийнхантай ярилцлага хийж эхэлжээ. Ослын урьдчилсан дүгнэлт 30 хоногийн дотор гарах хүлээлттэй байгаа бөгөөд шалгалтын ажиллагаа дуустал 169-р нислэгийн багийн гишүүдийг түр хугацаагаар үүрэгт ажлаас нь чөлөөлсөн байна. Энэхүү үйл явдал нь нисэх онгоцны буудлын ойр орчмын аюулгүй байдлын бүс болон цаг агаарын хүнд нөхцөлд газардах үеийн эрсдэлийн удирдлагыг дахин хянах шаардлагатайг харууллаа.
Эх сурвалж:
• wfin.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.