Хэр хэмжээгээр согтууруулах ундаа хэрэглэнэ төдий чинээ хорт хавдар үүсдэг

Архи уусны улмаас нойр булчирхай, ходоод, элэг, залгиур хоолой, бүдүүн шулуун гэдэс, хөхний болон амны хөндийн хорт хавдар тусах эрсдэл нэмэгддэг. Архи согтууруулах ундаа хавдар үүсгэгч гол эрсдэлт хүчин зүйл гэдгийг манайхан тэр бүр мэддэггүй. 
Хавдрын Судалгааны Олон улсын Агентлагаас (Дэлхийн эрүүл мэндийн байгууллагын хавдрын чиглэлийн харьяа байгууллага) согтууруулах ундааг 1988 оноос хойш хавдар үүсгэгч бодисын 1-р ангилалд оруулдаг болсон. Нэгдүгээр ангилалд багтана гэдэг нь хамгийн өндөр эрсдэлтэй гэсэн үг юм. 

Өдөрт 4 ба түүнээс дээш тооны нэгж согтууруулах ундаа хэрэглэдэг хүнийг огт хэрэглэдэггүй эсвэл хааяа хэрэглэдэг хүмүүстэй харьцуулахад хавдар үүсэх эрсдэл 5 дахин өндөр байдаг

Архи, согтууруулах ундаа нь бүдүүн шулуун гэдэс, ам, залгиур, гуурсан хоолой, улаан хоолой, элэгний хавдар үүсэх гол шалтгаан болдог байна. Хэдий их хэмжээний согтууруулах ундаа хэрэглэнэ, хавдар үүсэх магадлал төдий чинээ нэмэгдэнэ. 

Өдөрт 4 ба түүнээс дээш тооны нэгж согтууруулах ундаа хэрэглэдэг хүнийг огт хэрэглэдэггүй эсвэл хааяа хэрэглэдэг хүмүүстэй харьцуулахад хавдар үүсэх эрсдэл 5 дахин өндөр байдаг. Түүнээс гадна өдөрт ганц нэгжээс (Нэг нэгж согтууруулах ундаа нь 76 мл дарс, 25 мл виски, 250 мл шар айраг) хэтрэхгүй бага хэмжээний согтууруулах ундаа хэрэглэдэг хүмүүсийн хувьд хавдрын эрсдэл 20 хувь байдаг.

Согтууруулах ундааны хэрэглээ хөхний хавдар тусах эрсдэлийг нэмэгдүүлдэг

Согтууруулах ундааг маш бага хэмжээтэй ч хамаагүй, байнга хэрэглэх нь хөхний хавдар тусах эрсдэлийг нэмэгдүүлж байдаг. 2012 оны тойм судалгаагаар өдөрт нэг удаа (ойролцоогоор 1.5 нэгж) согтууруулах ундаа хэрэглэвэл хөхний хавдар тусах эрсдэлийг 5 хувиар нэмэгдүүлдэг болохыг тогтоожээ. Түүнээс гадна, өдрийн 10 гр согтууруулах ундааны хэрэглээ тутамд хөхний хавдрын эрсдэл 7-12 хувиар нэмэгддэг байна. Өдөрт 2-5 нэгж согтууруулах ундаа хэрэглэдэг эмэгтэйчүүдийн хувьд огт согтууруулах ундаа хэрэглэдэггүй эмэгтэйчүүдтэй харьцуулахад хөхний хавдар 1.5 дахин их тохиолддог.