Путинтэй хаалттай уулзалт хийсэн Беларусийн ерөнхийлөгч тэр даруй Бээжинд айлчилж Си Зиньпинтэй уулзжээ
БНХАУ-ын дарга Си Зиньпин, Беларусийн ерөнхийлөгч Александр Лукашенко нар 2026 оны зургаадугаар сарын 29-ний өдөр Бээжин хотын "Дяоютай" төрийн зочид буудалд гурван цаг гаруй хугацаанд ганцаарчилсан уулзалт хийжээ.
ОХУ-ын Ерөнхийлөгч Владимир Путинтэй "Валдай" дахь өргөөнд нь хаалттай уулзалт хийснийхээ дараа шууд Бээжинг зорьсон А.Лукашенкогийн эл айлчлал нь хоёр улсын стратегийн түншлэл, эдийн засгийн хамтын ажиллагаа болон бүс нутгийн аюулгүй байдлыг бэхжүүлэхэд чиглэж байгаа гэв.
Бээжинд хүрэлцэн ирэхээсээ өмнө А.Лукашенко зургаадугаар сарын 26-27-ны хооронд ОХУ-ын Ерөнхийлөгч В.Путинтэй "Валдай" дахь өргөөнд нь бүтэн өдрийн турш хаалттай уулзсан юм.
Хэвлэл мэдээллийнхэнд хаалттай, хамтарсан мэдэгдэл болон албан ёсны гэрэл зураггүйгээр өрнөсөн уг уулзалтаар талууд эдийн засгийн хамтын ажиллагаа, эрчим хүч, аж үйлдвэрийн салбарын асуудлуудыг хөнджээ. Мөн Украины зүгээс хилийн бүс дэх дамжуулагч станцуудтай холбоотойгоор Беларусийн талд үзүүлж буй шахалтын талаар зөвлөлдсөн байна.
Бээжинд болсон уулзалтын үеэр Си Зиньпин Беларусийн тусгаар тогтнол, газар нутгийн бүрэн бүтэн байдлыг БНХАУ тууштай дэмжихээ илэрхийлж, хоёр орныг "ган бат найзууд" хэмээн тодорхойлов. Тэрээр хоёр талын харилцаа түүхэн дээд цэгтээ хүрснийг тэмдэглэсэн бол А.Лукашенко Хятад улсыг найдвартай стратегийн түнш гэдгийг баталсан юм. Талууд НҮБ болон Шанхайн хамтын ажиллагааны байгууллагын (ШХАБ) хүрээнд хамтын ажиллагаагаа гүнзгийрүүлж, дэлхий дахинд тогтворжуулагч хүчин болж ажиллахаар тохиролцжээ.
Уг айлчлал нь Беларусь-Украины хил дээр хурцадмал байдал үүссэн үетэй давхцаж байна.
Украины Ерөнхийлөгч Владимир Зеленскийн тавьсан тулган шаардах хугацаа дууссаны дараа Оросын нисгэгчгүй аппаратуудыг удирдахад ашигладаг дамжуулагч станцуудын үйл ажиллагааг Беларусийн нутаг дэвсгэрт зогсоосон юм. Уулзалтын үеэр удирдагчид бүс нутгийн аюулгүй байдлын эгзэгтэй нөхцөл байдлын талаар санал солилцсон байна.
Уулзалтын төгсгөлд удирдагчид бэлэг солилцсон бөгөөд А.Лукашенко Хятадын даргад Беларусийн шоколад бэлэглэсэн бол хариуд нь Хунань мужид ургуулсан алим бэлгэнд авчээ. Олон улсын ажиглагчид эл айлчлалыг гурван гол зорилготой гэж үзэж байна.
Нэгдүгээрт, А.Лукашенко Кремлийн итгэмжлэгдсэн элчийн хувиар В.Путины нууц зурвасыг дамжуулсан байх магадлалтай. Хоёрдугаарт, Оросоос хэт хараат байдлаа тэнцвэржүүлэх, гуравдугаарт, барууны хориг арга хэмжээний эсрэг Хятадын технологи, санхүүгийн дэмжлэгийг авах сонирхолтой байгааг шинжээчид онцолжээ.
Бээжин дэх хэлэлцээгээ өндөрлүүлсэн Александр Лукашенко Зүүн болон Зүүн Өмнөд Азийн орнуудаар хийх дипломат аяллаа үргэлжлүүлж, шинэ түншлэлийн боломжуудыг эрэлхийлэхээр хөдөлсөн байна. Хятад улстай тогтоосон "ган бат" харилцаа нь Беларусийн хувьд геополитикийн хүнд нөхцөлд оршин тогтнох, эдийн засгаа хамгаалах чухал хэрэгсэл болж үлдэх төлөвтэй байна.
Эх сурвалж:
• soyuz.by
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.