Эстонийн батлан хамгаалахын компанид гарсан галыг "ОХУ-ын хорлон сүйтгэх ажиллагаа" гэж дүгнэв
Эстони улсын дотоод аюулгүй байдлын алба нийслэл Таллин хотод үйл ажиллагаа явуулдаг "Milrem Robotics" батлан хамгаалахын компанийн байранд гарсан галыг Оросын тагнуулын алба шууд захиалж үйлдүүлсэн хорлон сүйтгэх ажиллагаа байсныг албан ёсоор дүгнэж зарлалаа.
Зургаан долоо хоног үргэлжилсэн мөрдөн шалгалтын үр дүнд Украины армид зориулан байлдааны техник нийлүүлдэг тус байгууламжийг зориуд галдан шатаасан болохыг бүрэн итгэлтэйгээр тогтоожээ.
Хэрэг явдал Ласнамяэ дүүргийн Бетони гудамжинд байрлах тус компанийн барилгад наймдугаар сарын 15-ны шөнө гарсан байна. Онцгой байдлын албаныхан дэгдсэн галыг шуурхай цурманд оруулснаар хүн бэртэж гэмтээгүй бөгөөд үйлдвэрийн үйл ажиллагаа болон нийлүүлэлтэд хохирол учраагүй юм. "Milrem Robotics" нь логистик, эмнэлгийн нүүлгэн шилжүүлэлт болон байлдааны дэмжлэгт өргөнөөр ашигладаг "THeMIS" загварын өөрөө явагч робот системийг үйлдвэрлэдэг бөгөөд Нидерланд улс Украинд нийлүүлэхээр 150 гаруй ширхэгийг захиалаад байжээ.
Дотоод аюулгүй байдлын албаны ерөнхий захирал Марго Паллосон уг үйл явдлыг Европ даяар өрнөж буй Оросын хорлон сүйтгэх тактикийн нэг хэсэг хэмээн тодорхойлов. Түүний мэдээлснээр 2026 онд хэрэгжүүлэхээр төлөвлөсөн хэд хэдэн ажиллагааг урьдчилан таслан зогсоосон ч энэ удаагийн халдлага илрэлгүй үйлдэгдсэн анхны тохиолдол болсон байна.
Мөрдлөгийн хүрээнд Латви улсын гурван иргэнийг наймдугаар сарын 17, 18-ны өдрүүдэд баривчилсан бөгөөд тэдний эд зүйлсээс гал тавихад ашигласан хэрэгсэл, дижитал мэдээлэл хадгалагчдыг олж илрүүлжээ. Сэжигтнүүдийг есдүгээр сарын дундуур Эстонид шилжүүлэн өгч, цагдан хорьж байна.
Эстонийн Ерөнхий сайд Кристен Михал уг халдлага нь Киевийн засгийн газарт үзүүлэх барууны тусламжийг сулруулах далд оролдлого болохыг буруушааж, улс орон нь дарамт шахалтад автахгүйгээр хамгаалалтаа улам бэхжүүлнэ гэдгээ мэдэгдэв. Гадаад хэргийн сайд Маргус Цахкна уг үйлдлийг огт хүлээн зөвшөөрөхгүй хэмээн мэдэгдэж, ОХУ-ын хэргийг түр хамаарагчийг яамандаа дуудан эсэргүүцэл илэрхийлжээ. Харин Кремлийн хэвлэлийн төлөөлөгч Дмитрий Песков эдгээр мэдэгдлийг ямар ч нотолгоогүй, бодит байдлаас ангид гүтгэлэг хэмээн үгүйсгэсэн байна.
Эх сурвалж:
• cbc.ca
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.