Apple компани патентын маргаанд ялагдаж 5.7 тэрбум ам.доллар төлөхөөр болов
АНУ-ын Сан-Диего хотын холбооны тангарагтны шүүх технологийн аварга “Apple” компанийг патентын эрх зөрчсөн хэрэгт буруутган, “Taction Technology” компанид 5.72 тэрбум ам.долларын нөхөн төлбөр олгох шийдвэр гаргалаа. Энэхүү шийдвэр нь АНУ-ын түүхэнд патентын маргааны улмаас шүүхээс ногдуулж буй хамгийн өндөр дүнтэй нөхөн төлбөрт тооцогдож байна.
Маргааны гол сэдэв нь “iPhone” утас болон “Apple Watch” цагны чичиргээ, хүрэлцэхүйн мэдрэгчтэй дохиог үүсгэгч “Taptic Engine” тоног төхөөрөмж юм. “Taction Technology” компани өөрсдийн үүсгэн байгуулагч доктор Жэймс Биггсийн зохион бүтээсэн цахилгаан соронзон хөдөлгөөн сааруулагч технологитой холбоотой хоёр патентыг “Apple” зөвшөөрөлгүй ашигласан хэмээн нэхэмжлэл гаргасан аж.
Тодруулбал, тус жижиг фирмийн чихэвч болон тоглоомын төхөөрөмжид зориулсан технологийг “Apple” хуулбарлан өөрийн бүтээгдэхүүний олон үе шаттай загварт нэвтрүүлсэн хэмээн буруутгажээ.
Хууль зүйн маргаан 2021 оны дөрөвдүгээр сараас эхэлсэн бөгөөд 2023 онд анхан шатны шүүхээс хэргийг хэрэгсэхгүй болгож байсан ч 2025 онд давж заалдах шатны шүүх хэргийг дахин сэргээсэн байна. Ингээд 2026 оны есдүгээр сарын 14-нд эхэлсэн шүүх хурал хоёр өдөр зөвлөлдсөний эцэст долоон хүний бүрэлдэхүүнтэй тангарагтны шүүгчид “Apple”-ийг патент зөрчсөн гэж үзжээ. Шүүх бүрэлдэхүүн “Apple”-ийн үйлдлийг санаатай биш хэмээн тогтоосон тул нөхөн төлбөрийн хэмжээг хуулийн дагуу гурав дахин нэмэгдүүлээгүй аж
Харин “Apple” уг шийдвэрийг эрс няцааж, давж заалдахаа мэдэгдлээ.
Тус компанийн зүгээс “Taptic Engine” технологи нь “Taction”-ийн бүтээлээс зарчмын хувьд өөр болохыг шүүхийн шатанд хийсэн туршилтууд харуулсан гэж тайлбарлаж байна. Хэдийгээр 5.7 тэрбум ам.долларын нөхөн төлбөр ногдуулсан ч энэ нь эцсийн шийдвэр биш бөгөөд “Apple” шүүгчид хандан төлбөрийн дүнг бууруулах, эсвэл цуцлах хүсэлт гаргаж, шаардлагатай бол тойргийн давж заалдах шатны шүүхэд асуудлыг дахин тавихаар төлөвлөж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.