Линдси Клэнсигийн өмгөөлөгч хэргийг нотлох баримтгүй хэмээн үзэж цагаатгахыг шаардлаа
АНУ-ын Массачусетс мужийн Плимут хотын Дээд шүүхэд болсон урьдчилсан сонсголын үеэр гурван хүүхдийнхээ аминд хүрсэн хэрэгт буруутгагдаж буй Линдси Клэнсигийн өмгөөлөгч Кевин Реддингтон гэнэтийн тактикийн өөрчлөлт хийж, прокурорын талыг "хүүхдүүдийг эх нь хөнөөсөн гэдгийг нотолж чадаагүй" хэмээн мэдэгдлээ. Тэрбээр шүүгч Уильям Ф.Салливанаас хэргийн нотлох баримт хуулийн шаардлага хангахгүй байгаа тул хэргийг хэрэгсэхгүй болгож, үйлчлүүлэгчийг нь бүрэн цагаатгах хүсэлт гаргасан байна.
Өдгөө 36 настай, амаржих газрын сувилагч асан Линдси Клэнси нь 2023 оны нэгдүгээр сарын 24-ний өдөр Даксбери дэх гэрийнхээ зоорийн давхарт 5 настай Кора, 3 настай Доусон, 8 сартай Каллан нарыг дасгалын суналтын резинээр боомилж амийг нь бүрэлгэсэн хэрэгт холбогдоод байгаа юм. Тухайн үед тэрбээр өөрийгөө гэмтээн, хоёрдугаар давхрын цонхоор үсэрч амиа хорлохыг завдсаны улмаас биеийн доод хэсэг нь саажилттай болсон юм.
Өмгөөллийн тал өмнөх шүүх хуралдаануудын үеэр "хүүхдүүдийн үхэлд эх нь буруутай" гэдэгтэй огт маргадаггүй байсан бөгөөд зөвхөн "төрсний дараах сэтгэцийн хурц эмгэгийн улмаас эрүүгийн хариуцлага хүлээх чадваргүй байсан" гэх үндэслэлээр байр сууриа хамгаалж ирсэн билээ.
Энэхүү хэргийг хэлэлцсэн тангарагтны шүүх өнгөрсөн есдүгээр сарын 4-нд долоон хоног зөвлөлдсөний эцэст нэгдсэн шийдэлд хүрч чадалгүй мухардалд орсон юм. Тангарагтны шүүхийн 12 гишүүний 11 нь Линдси Клэнсиг төрсний дараах сэтгэцийн өвчний улмаас гэм буруугүй гэж үзсэн бол тангарагтан Майкл Десронвил ганцаараа түүнийг гэм буруутай хэмээн үзэж саналаа өгсөн байна.
Харин туслах тойргийн прокурор Шанан Бакингем уг байр суурийг няцааж, өмгөөллийн тал хүүхдүүдийг эх нь хөнөөснийг батлаагүй гэж үзэж байгаа нь өмнөх бүх мэдэгдэлтэй нь зөрчилдөж буй инээдэмтэй үйлдэл хэмээн шүүмжилсэн байна.
Шүүгч Салливан цагаатгах хүсэлтийг тэр даруй шийдвэрлээгүй бөгөөд дараагийн сонсголыг 2026 оны арваннэгдүгээр сарын 2-ны өдөр хийхээр товложээ. Уг хуралдаанаар дахин шүүх хурлын товыг хэлэлцэхээс гадна тангарагтан Майкл Десронвилын асуулга болон гар утас ашигласан байдалд шалгалт явуулах эсэх, өмгөөлөгчийн мэдээлэл тараах эрхийг хязгаарлах эсэхийг шийдвэрлэх юм. Түүнчлэн Клэнсигийн иргэний хэргийн өмгөөлөгч Эндрю Мейер сэтгэцийн хямралыг зохих ёсоор оношилж арга хэмжээ аваагүй эмч, эмнэлгийн байгууллагуудад хариуцлага тооцуулахаар шүүхэд нэхэмжлэл гаргахаа мэдэгдээд байна.
Эх сурвалж:
• cbc.ca
• pbs.org
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.