Украины арми Донецк мужийн умард хэсэгт 176 хавтгай дөрвөлжин км газар чөлөөлөв
Украины зэвсэгт хүчний Гуравдугаар армийн корпус Донецк мужийн умард бүсэд "Вивальди" цэргийн ажиллагааг хэрэгжүүлж, нийт 176 хавтгай дөрвөлжин километр нутаг дэвсгэрийг буцаан хяналтдаа авсан байна. Бригадын генерал Андрей Билецкийн удирдсан тус цэргийн нэгтгэл сүүлийн шатанд 51 хавтгай дөрвөлжин километр талбайг чөлөөлж, Жеребец голын чиглэлд давшилт хийжээ.
Цэргийн ажиллагааны гурав дахь үе шатанд өмнө нь хяналтаа алдсан байсан хоёр сууринг эргүүлэн авч, нэмэлтээр гурван тосгоныг бүрэн чөлөөлсөн байна. Энэ үеэр Оросын зэвсэгт хүчний талаас 2000 гаруй цэрэг амь үрэгдэж шархадсан бол 250 гаруй алба хаагч дайны олзлогдогч болсныг гуравдугаар армийн корпусын командлалаас мэдэгдлээ.
Шинжээчид энэхүү давшилтыг стратегийн хувьд өндөр ач холбогдолтой хэмээн дүгнэж, сөрөг довтолгоо нь Украины дорнод бүс дэх хотуудын бэхлэлтийн шугамыг өргөн хүрээгээр тойрон бүслэх зорилготой Москвагийн төлөвлөгөөг тасалдуулж, давшилтын эрчийг сааруулах гол үр дүнг үзүүлсэн байна.
Одоогоор Украины тал Донецк мужийн нийт газар нутгийн 20 орчим хувийг хамгаалан барьж байгаа бөгөөд тус муж нь Москвагийн цэргийн компанит ажлын гол бай хэвээр үлдэж байна. Оросын давшилтын хурд саарсан ч өмнөд чиглэлээс тасралтгүй шахалт үзүүлж, Константиновка зэрэг хотууд руу нэвтрэхийг оролдсоор байгаа аж.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.