Mango брэндийг үүсгэн байгуулагчийн хүүг эцгийнх нь үхэлд сэжиглэн баривчлав
Испанийн алдарт Mango брэндийг үүсгэн байгуулагч Исак Андикийн ууган хүү, 45 настай Жонатан Андикийг эцгийнхээ амь насыг хөнөөсөн хэрэгт сэжиглэн Барселона хотноо баривчиллаа.
Шүүхээс түүнийг нэг сая еврогийн батлан даалтаар суллах шийдвэр гаргасан бөгөөд уг хэргийг золгүй явдал бус, санаатай хүн амины хэрэг хэмээн албан ёсоор зүйлчилж эхэлжээ.
Тэрбумтан Исак Андик 2024 оны 12 дугаар сарын 14-нд Барселона хотын ойролцоох Монтсеррат ууланд алхаж явахдаа 150 орчим метрийн өндөр хаднаас унаж амиа алдсан юм. Тухайн үед түүний хажууд зөвхөн хүү Жонатан нь байсан бөгөөд эцгийгээ нарийн жим дээр халтирч унасан гэж мэдүүлж байв. Гэмт хэргийн шинжтэй нотлох баримт олдоогүй тул 2025 оны нэгдүгээр сард уг хэргийг золгүй явдал хэмээн үзэж хаасан байдаг.
Гэвч Каталонийн цагдаагийн газар сэжигтний мэдүүлгээс ноцтой зөрчлүүд илрүүлснээр 2025 оны сүүлээр мөрдөн байцаалтыг нууцаар дахин эхлүүлжээ.
Жонатаны гар утсанд хийсэн дижитал шинжилгээгээр тэрээр ослын өдөр зураг дарсан байсан нь өмнөх мэдүүлэгтэй нь зөрчилдсөн байна. Түүнчлэн хэргийн газарт хийсэн криминалистикийн шинжилгээгээр тухайн жимээс гадны нөлөөгүйгээр унах боломжгүй гэсэн дүгнэлт гарчээ.
Мөрдөн байцаалтын явцад хэргийн сэдэлт байж болзошгүй нөхцөл байдал тогтоогдсон байна. Исакийн хуучин хамтрагч Эстефания Кнут эцэг, хүү хоёрын дунд компанийн удирдлагын асуудлаас үүдэлтэй удаан хугацааны зөрчилдөөн байсан талаар мэдүүлжээ.
Талийгаач, хүүгийнхээ үйл ажиллагаанд сэтгэл дундуур байсан тул гэрээслэлээ өөрчилж, удирдлагыг хөндлөнгийн менежерүүдэд шилжүүлэхээр төлөвлөж байсан аж. Марторель хотын шүүхээс Жонатаны гадаад паспортыг хураан авч, Испаниас гарахыг хориглосон бөгөөд долоо хоног бүр шүүхэд бүртгүүлэх үүрэг хүлээлгэсэн байна.
Андикийн гэр бүлийн албан ёсны төлөөлөгч Жонатаныг гэм буруугүй гэдэгт бүрэн итгэлтэй байгаагаа илэрхийлж, мөрдөн байцаалтын үйл ажиллагаатай үргэлжлүүлэн хамтран ажиллахаа мэдэгдэв. Одоогоор Mango компани хэвийн ажиллаж байгаа хэдий ч дэд ерөнхийлөгчийнх нь баривчилгаа бизнесийн хүрээнд томоохон доргион үүсгээд байна. Тэрбумтны үхлийн жинхэнэ шалтгааныг тогтоохоор хууль сахиулагчид хэргийг маш нууц байдалд үргэлжлүүлэн шалгаж байна.
Эх сурвалж:
• rtvi.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.