Сүүлийн үед мэргэжилтнүүд энэ халдварыг хумьж, шуурхай арга хэмжээ авах тактикаа өөрчилж байгаатай холбоотойгоор өчигдөр Эрүүл мэндийн сайдын А/203 дугаар тушаал гарчээ. Уг тушаалын хүрээнд коронавируст халдварын үед авах хариу арга хэмжээнд томоохон өөрчлөлт орсныг танилцуулав.

ЭМЯ-ны Судалгаа, төлөвлөлтийн хэлтсийн дарга Б.Бумдэлгэр:

ХӨСҮТ коронавируст халдварын хариу арга хэмжээг ерөнхийд нь хянаж, зохицуулж, мэргэжил арга зүйгээр хангадаг бөгөөд шинжилгээний ихэнх ачааллыг дангаараа үүрч, лабораториудын шинжилгээг баталгаажуулах үйл ажиллагааг явуулдаг байсан. Харин сайдын шинэ тушаалаар халдварт өвчинтэй тэмцэх хариу арга хэмжээний багийг дүүрэг бүрд зохион байгуулахаар болж байгаа. Энэ нь нэг газарт ачааллыг төвлөрүүлэхгүй байх ач холбогдолтой.

Нэг үгээр хэлбэл, ХӨСҮТ дүүрэг бүхэн дээр ажиллана. ХӨСҮТ дүүрэг бүхэн дээр хүрч ажиллаж чадахгүй байна. Өмнө нь ХӨСҮТ бүх эерэг тохиолдол дээр очдог байсан. Одоо дүүргийн эмч нар гэрээр нь очоод хүмүүсийнхээ биеийн байдлыг үнэлээд хүндрэх магадлалтай хүмүүсийг эмнэлэгт авчирж, хөнгөн өвдөх магадлалтай хүмүүсийг тусгаарлах чиглэл өгч байна.

Ингэснээр тандалтын эмч нар дүүрэг бүрд шинжилгээ яаж зохион байгуулах, өвчтөнийг эмнэлэгт авчирч цээжний рентген зураг авч, оношилж эрэмбэлнэ гэсэн үг. Дүрс оношилгоогоор тухайн өвчтөний хөнгөн эсвэл хүнд байгааг ийнхүү дүүргийн эмнэлэгт дээр нь ялгах юм. Хамгийн чухал нь тандалт гэж үзэж байгаа. Эерэг гарсан хүмүүсийг илрүүлж, эрүүл хүмүүсээс тусгаарлах. Эерэг хүмүүсийг гэрт нь үлдээж болохгүй. Хөнгөн байсан ч гэрт нь үлдээхгүй.

---