ОХУ-ын Ерөнхийлөгч Владимир Путин тус улсад нэгтгэсэн Украины Херсон, Донецк, Луганск, Запорожье зэрэг дөрвөн бүс нутагт өнөөдрөөс /2022.10.20/ эхлэн дайны байдал тогтоожээ.

Ийнхүү цэргийн онц байдал зарласан нь Орост нэгтгэсэн мужуудын оршин суугчдын амьдрал эргээд хэвийн байдалдаа орж байгаа гэх Кремлийн байр суурьтай эрс зөрчилдөж байна. Бодит байдал дээр, өмнөд хэсгийн Херсон хотыг цэргийн удирдагчид захирах болсон бөгөөд иргэдийг олноор нь нүүлгэн шилжүүлэх ажил үргэлжилж байгаа юм. 

Харин Москвагийн зүгээс дайны байдал зарласнаар, эдгээр бүс нутагт иргэний хамгаалалтын хүчийг бий болгож, хөл хорио тогтоон, иргэдийн орж, гарах, олноороо цугларах эрхийг хязгаарлан, хатуу цензур хэрэгжүүлж, хууль сахиулах байгууллагын эрх мэдлийг улам өргөжүүлэх боломжтой болж байна. Энэхүү байлдааны цагийн хуулийн дагуу, эрх баригчид энгийн иргэдийг албадан нүүлгэн шилжүүлэх ч боломжтой юм.

Тэгвэл Ерөнхийлөгч Путин энэхүү арга хэмжээгээрээ дамжуулан "Украины хүн амыг Оросын буурай хөгжилтэй бүс нутаг руу олноор нь шилжүүлж, эзлэгдсэн нутаг дэвсгэр дэх угсаатны бүрэлдэхүүнийг өөрчлөхөд бэлтгэж байгаа" гэж Украины Үндэсний аюулгүй байдал, батлан ​​хамгаалах зөвлөлийн Нарийн бичгийн дарга Алексей Данилов мэдэгджээ.

Украины бүс нутагт дайны байдал зарлахаас гадна ноён Путин Орос даяар хатуу чанга дэглэм тогтоож, шинэ хязгаарлалтууд хэрэгжүүлэхээр зэхэж байна. Үүний хүрээнд, дайныг эсэргүүцсэн жагсаал цуглаанд оролцсон иргэдийг илүү хатуу шийтгэж, Кремлийн албан ёсны байр сууриас зөрүүтэй мэдээлэл тараасан хүмүүст хорих ял оноож болзошгүй юм. Түүнчлэн, Украинтай ойролцоо оршдог бүс нутагт илүү хатуу хязгаарлалт тогтоох ба хил орчмын эрх баригчид оршин суугчдыг нүүлгэн шилжүүлж, хөдөлгөөнийг нь хориглох эрхтэй болох аж.

Эх сурвалж: AP

---