92 настай эмэгтэйд хуурамч вакцин тарьсан этгээдийг эрэн сурвалжилж байна
Их Британийн цагдаа нар 92 настай эмэгтэйд хуурамч коронавирусийн вакцин тарьж, түүнээс 160 фунт стерлинг буюу 217 ам.долларын төлбөр авсан этгээдийг эрэн сурвалжилж байна.
Лондон хотын цагдаагийн газрын Оюуны өмчийн гэмт хэрэгтэй тэмцэх хэлтсээс хуурамч коронавирусийн вакцин хийн, хариуд нь өндөр төлбөр шаардсан 30 орчим насны эрэгтэйн зургийг олон нийтэд дэлгэн, түүнийг олж тогтооход тусламж үзүүлэхийг хүсжээ.
Албаныхны мэдээлснээр сэжигтэн өнгөрөгч арванхоёрдугаар сарын 30-нд Лондоны баруун өмнөд хэсэгт орших Сурбитон дахь хохирогчийн гэрт очин, өөрийгөө Үндэсний эрүүл мэндийн албаны ажилтан гэж танилцуулсан байна.
Ингээд тэрээр хохирогч эмэгтэйн гарыг үзүүртэй зүйлээр хатгаад, дараа нь 160 фунтийн төлбөр шаардсан бөгөөд Үндэсний эрүүл мэндийн албанаас нөхөн төлнө гэж хэлжээ. Удалгүй хэд хоногийн дараа тэрээр эмэгтэйн гэрт дахин очиж, 100 фунт стерлингийн төлбөр нэмж өгөхийг хүссэн гэж цагдаа нар мэдэгдсэн юм.
Сэжигтэн хохирогч эмэгтэйд тариа тарьсан эсэх, тийм тохиолдолд ямар төрлийн бодис тарьсан нь хараахан тодорхойгүй байгаа гэдгийг Лондон хотын цагдаагийн газраас мэдээлжээ. Мөн уг эмэгтэйг эмнэлгийн үзлэгт оруулсан бөгөөд ямар нэгэн сөрөг нөлөө илрээгүй байна.
Эх сурвалж: CNN
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.