ВИДЕО: БНСУ-д монгол залуу нутаг нэгтнээ архины шилээр цохин, танхайрчээ
БНСУ-ын нийслэл Сөүл хотын Гванжин дүүргийн нэгэн дэлгүүр дотор гурван монгол иргэн шөнө оройн цагаар согтууруулах ундаа хэрэглэж байхдаа нэгийгээ архины шилээр цохин, зодож танхайрсан хэрэг долдугаар сарын 13-ны өдөр гарчээ.
40 орчим насны монгол иргэн А нь 30-аад насны нутаг нэгтэн эрэгтэйг гэнэт архины шилээрээ цохиж буй дүр зураг хяналтын камерт бичигдсэн байна. Тэдэнтэй хамт байсан өөр нэгэн монгол эрэгтэй А-г болиулахыг хичээсэн ч тэрээр эргэж ирэн, хохирогч эрэгтэйг зодож эхэлжээ. Үүний дараагаар А дэлгүүрээс гаран, цус нь урсаж буй хохирогчийг үргэлжлүүлэн гудамжинд зодож, танхайрсан болохыг хэргийн газарт байсан гэрчүүд мэдүүлсэн юм.
Хоорондын маргааны улмаас гарсан уг гэмт хэргийн хохирогч хүнд бэртсэн ч, түүний амь насанд аюул учраагүй гэж албаныхан мэдэгджээ. Сөүл хотын Гванжин хотын цагдаа нар иргэн А-г түр саатуулаад байгаа бөгөөд хэргийн нарийн нөхцөл байдлыг шалгаж байна.
Эх сурвалж: MBN News
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.