Эрдэмтэд 100-72 сая жилийн өмнөх аварга том наймаалжны олдворыг илрүүлжээ
"Science" сэтгүүлд 2026 оны дөрөвдүгээр сарын 23-нд нийтлэгдсэн шинэ судалгаагаар ойролцоогоор 100-72 сая жилийн өмнөх Хожуу Цэрдийн галавын үед далайн мандалд аварга том наймаалжнууд ноёрхож байсныг илрүүллээ. Энэхүү нээлт нь эртний далайн экосистемийн талаарх бидний ойлголтыг үндсээр нь өөрчилж байна.
Судлаачдын тооцоолсноор эдгээр эртний аварга наймаалж нь 7-19 метр буюу нийтийн тээврийн автобуснаас ч урт хэмжээтэй байжээ. Энэ нь орчин үеийн хамгийн том аварга наймаалжнаас бараг зургаан метрээр урт бөгөөд одоогоор мэдэгдэж буй хамгийн том сээр нуруугүй амьтан байж болзошгүйг харуулж байна. Судалгааны баг "Nanaimoteuthis haggarti" болон "Nanaimoteuthis jeletzkyi" гэсэн хоёр үндсэн төрөл зүйлийг тодорхойлсон бөгөөд сүүлийнх нь олдсоноор мэдэгдэж буй хамгийн эртний наймаалжны түүхийг 5 сая жилээр, сэлүүрт наймаалжны түүхийг 15 сая жилээр урагшлуулсан байна.
Зөөлөн биетэй толгой хөлтнүүд чулуужих нь ховор байдаг тул эрдэмтэд шавжны гаднах бүрхүүлтэй ижил хитин хэмээх бодисоос тогтсон тотьны хошуу мэт хатуу эрүүнд нь гол анхаарлаа хандуулжээ.
Палеонтологичид Япон болон Канадын Ванкувер арлаас өмнө нь олдсон 15, мөн Японы чулуулгийн тунадаснаас шинээр илрүүлсэн 12, нийт 27 чулуужсан эрүүнд дүн шинжилгээ хийсэн байна.
Шинэ олдворуудыг илрүүлэхийн тулд чулуулгийн дотор нуугдсан хэсгийг сканнердаж хардаг "цахим олдвор олборлолт" хэмээх шинэлэг аргыг анх удаа ашигласан бөгөөд эдгээр эртний хошууны хэмжээ, хэлбэрийг орчин үеийн наймаалжтай харьцуулах замаар тэдний аварга биеийн хэмжээг тооцоолон гаргажээ.
Түүхэндээ эрдэмтэд Цэрдийн галавын үеийн далайн экосистемийг зөвхөн аварга загас, мозазавр, плезиозавр зэрэг том сээр нуруутан амьтад захирч байсан гэж үздэг байв. Гэвч чулуужсан эрүүнд үлдсэн зураас, цууралт, элэгдэл зэрэг нь тэдгээр аварга сээр нуруугүй амьтад хүчирхэг хэвлээр явагчидтай ана мана өрсөлдөж, магадгүй тэднийг агнадаг байсныг баталж байна.
Японы Хоккайдогийн их сургуулийн палеонтологич, судалгааны хамтран зохиогч Ясүхиро Ибагийн тайлбарласнаар, зарим эрүүний урд үзүүр 10 хувь хүртэл элэгдсэн байсан нь наймаалжнууд аварга том эрүүгээ ашиглан хатуу хуягт олз, цаашлаад мозазавр зэрэг том сээр нуруутан амьтдын ясыг буталдаг байсныг нотолж байна.
Энэхүү нээлтийг шинжлэх ухааны нийгэмлэг өндрөөр үнэлж, зөөлөн биетний олдвор ховор байдгаас шалтгаалан өнөөг хүртэл судлагдаагүй орхигдсон эртний экосистемийг гэрэлтүүлсэн чухал үйл явдал гэж үзэж байна.
Америкийн Байгалийн түүхийн музейн хүндэт куратор Нил Ландман уг судалгааг "маш нарийн нягт", "гайхалтай" хэмээн тодорхойлсон бол Алабамагийн их сургуулийн палеонтологич Адиел Кломпмакер эдгээрийг "харахад ч айдас төрүүлэм сүрлэг амьтад байсан нь гарцаагүй" хэмээн онцолжээ.
Цаашид энэхүү судалгаа нь эртний далайн хүнсний сүлжээний талаарх шинэ таамаглалуудыг дэвшүүлж, палеонтологийн салбарт илүү олон сонирхолтой нээлт хийх үүд хаалгыг нээж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.