🔴 Чуулганы хуралдааныг шинэ дарга томилогдтол УИХ-ын дэд дарга Ж.Бат-Эрдэнэ удирдан явуулж байхаар болов

УИХ-ын намрын ээлжит чуулганы өнөөдрийн хуралдаан эхэллээ. Өчигдөр Монгол Улсын нэгдсэн төсвийн 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд өөрчлөлт оруулах тухай хуулийн төслийг эцэслэн баталсан билээ. 

Өнөөдрийн хуралдааныг УИХ-ын дэд дарга Ж.Бат-Эрдэнэ удирдан явуулж байна. Учир нь УИХ-ын дарга асан Д.Амарбаясгалангийн оронд томилгоо хийгдээгүй байгаа тул шинэ дарга томилогдтол Ж.Бат-Эрдэнэ УИХ-ын даргын үүргийг гүйцэтгэхээр болсон билээ.

Чуулганы хуралдаанаар Монгол улсыг 2026-2030 онд хөгжүүлэх Үндсэн чиглэл батлах тухай УИХ-ын тогтоолын төслийг хэлэлцэж эхэллээ. Төслийг Ерөнхий сайд Г.Занданшатар танилцууллаа. Хэлэлцэж буй асуудалтай холбогдуулан гишүүд асуулт асууж хариулт авч байна.

УИХ-ын дэд дарга Б.Пүрэвдорж: Таван жилийн үндсэн төлөвлөгөө чинь мэргэжлийн байнгын хороон дээр унасан юм байна. Одоо УИХ-аар давах юм уу? Бодвол Н.Учрал сайд ганцаараа орсон байх л даа. Улсаа хөгжүүлэх төлөвлөгөө хэлэлцэж байхад Засгийн газрын сайд нар чинь орж ирэхгүй байна. Таныг хүндлэхгүй байна уу Г.Занданшатар сайд аа? 6-7 хон сайд сууж байна. Зарим сайд чинь /Т.Доржханд/ ажлаа өгөх юмсан гээд яриад явж байна. 

Хөгжлийн банкийг бодлогоор дэмждэггүй, зээл гаргах эрхийг нь гаргаж өгдөггүй. Засгийн газрын хамтын шийдвэрийг хэрэгжүүлдэггүй газар. Гэтэл 100 гаруй хүн цалин аваад л зүгээр сууж байна. Ямар арга хэмжээ авах вэ? Хоёрдугаарт, Зэс хайлуулах цогцолбор гэж газар байгуулсан ч Эрдэнэт үйлдвэрийн мафийнхан ажлыг нь зогсоогоод ажиллуулахгүй байна. Хариуцлагатай байгаарай. Улсын төсвийн нэг тэрбум доллар үнэгүйдэх нь.