Алганы арьс гуужвал амин дэм дутагдсаны шинж

Гар, хурууны шинж байдлаар нь тухайн хүний бие болоод дотор эрхтэнүүдийнх нь эрүүл эсэхийг тодорхойлж болдог. Тиймээс та өөрийн гар болон хуруу, хумсаа сайн ажиглаарай. Хэрэв хумс чинь хэтэрхий гүдгэр байвал зүрх болон уушги сайнгүйн шинж. Гүдгэр хумс дотогшоо махийсан байвал архаг ханиадтай гэсэн  үг. Харин хэтэрхий хотгор хумс бие организмд төмөр дутагдаж буйг илэрхийлдэг. Кальци дутагдсан үед хумсны толион дээр цагаан толбо үүснэ. Эмзэг хугарамтгай хумс уг хүнийг мэдрэлийн өвчтэй, эсвэл үргэлж сэтгэлийн хямралд автдаг болохыг харуулдаг.

Хумсан дээрээ хөндлөн атираатай бол нар салхи, цэвэр агаар дутагдаж байгаагийн шинж тэмдэг. Харин уртаашаа атираанууд нь ходоод гэдэсний үйл ажиллагаа муудаж, хоол шингээхдээ муу болсныг илэрхийлнэ. Хурууны үзүүр гүн улаан өнгөтэй бол хоол боловсруулах эрхтэндээ анхаарал тавиарай. Бараавтар, хүрэн улаан өнгөтэй бол бөөр, элгэнд өөрчлөлттэй. Эрхий хуруу бадайрч хөшвөл амьсгалын тогтолцооны үйл ажиллагаа суларсны шинж. Чигчий хуруу байнга бадайрч хөшвөл зүрхний эмчид даруй ханд.

Хэрэв хуруунуудын үзүүрийн арьсан дээр үрчлээс маягийн гүн нугалаа дагуу чиглэлээр гарч, гарын алга хатаж эвэршвэл дотоод шүүрлийн булчирхайн үйл ажиллагаа хямарсан гэсэн үг. Бамбай булчирхай, эсвэл чихрийн  шижин өвчтэй болсон байж болзошгүй. Долоовор хурууны  ар гадаргын арьс арзайж барзайвал цөсний эмгэгтэй. Улаан алгатай бол элэгний хордлогын шинж. Гепотит, гепатаз өвчний үед алга улаан болдог. Хэрэв алга шаравтар туяатай бол элэг болон цөсний хүүдийд эмгэгтэй. Элэгний үрэвсэл, цөс чулуужин, цөсний замын саатал, цөсний хүүдийн үрэвсэлт өвчний үед энэ шинж тэмдэг илэрдэг.

Алганы арьс жижиг хальс болон гуужиж байвал А болон Д амин дэм дутагдсаных. Алганы арьс том томоор ялтас болон гуужвал арьсны эмчид яаралтай үзүүлээрэй. Гарт чинь мөөгөнцөр халдварласан байж болзошгүй юм. Таны алга үргэлж хүйтэн байдаг бол захын цусны эргэлт саатаж, никотины хүчил дутагдаж байна. Үүнийг нөхөхийн тулд сүү сүүн бүтээгдэхүүн, загас, мөөгийг хүнсэндээ аль болох түлхүү хэрэглэ. Алга халуун оргивол элэг спиртийн төрлийн бүтээгдэхүүн болон бусад химийн бодисын хорыг саармагжуулж дийлэхгүй байна. Тиймээс архи уухаас татгалзаарай. Алга чийгтдэг бол дотоод шүүрлийн булчирхай өөрчлөлттэй. Магадгүй бамбай булчирхайн үйл ажиллагаа эрчимжиж буйн шинж тэмдэг.