АТГ: 1.3 сая ам.долларын авилгын хэрэгт хоёр гэрчээс мэдүүлэг авч санхүүгийн мөрдөн шалгах ажиллагааг эхлүүлсэн

Авлигатай тэмцэх газраас цаг үеийн асуудлаар болон олны анхаарал татсан эрүүгийн хэргүүдийн мөрдөн шалгах ажиллагааны явцын талаар мэдээлэл хийлээ. Тус газрын хэвлэл мэдээлэл, олон нийттэй харилцах газрын ажилтан, комиссар Б.Билэгт УИХ-ын гишүүн Л.Оюун-Эрдэнийн гаргасан гомдол, ЗТЯ-ны Төрийн нарийн бичгийн дарга асан А.Насантогтох болон бусад этгээдүүдэд холбогдох хэргийн талаар дараах тодруулгыг өгсөн юм.

-УИХ-ын гишүүн Л.Оюун-Эрдэнэ АТГ-т 894 хуудас материал хүлээлгэж өгсөн. Энэ дагуу хэрэг бүртгэлтийн хэрэг нээсэн үү?

-УИХ-ын гишүүн Л.Оюун-Эрдэнээс 2026 оны гуравдугаар сарын 23-ны өдөр ирүүлсэн гомдол, мэдээллийг АТГ хүлээн авч, гуравдугаар сарын 31-ний өдөр хэрэг бүртгэлтийн хэрэг нээсэн. Хэргийг Эрүүгийн хуулийн тусгай ангийн 22.4 дүгээр зүйлийн 3 дахь хэсэгт заасан "Улс төрд нөлөө бүхий этгээд хахууль авах" гэсэн зүйл ангиар үндэслэн шалгаж байна. Энэ нь албан тушаалтан чиг үүргээ хэрэгжүүлснийхээ хариуд бусдаас их хэмжээний авилга авсан байж болзошгүй гэх үндэслэл юм. Гомдол гаргагч Л.Оюун-Эрдэнээс гэрчийн мэдүүлэг авах ажиллагаа дөрвөн цаг гаруй үргэлжилсэн.

-Түүний өгсөн 894 хуудас материал болон хоёр цагийн бичлэгт яг юу байгаа вэ?

-Хэрэгт цугларсан баримт сэлт, бичлэгийн агуулга болон мэдүүлгийн талаарх дэлгэрэнгүй мэдээллийг одоогоор өгөх боломжгүй. Энэ нь мөрдөн шалгах ажиллагааны төлөвлөлт, үр дүнтэй шууд хамааралтай нууц мэдээлэл юм. Ямартай ч мөрдөн шалгах ажиллагаа тасралтгүй, шуурхай хийгдэж байна. Өнөөдрийн байдлаар уг хэрэгтэй холбогдуулан зургаан хүнээс мэдүүлэг авч гурван баримтад үзлэг хийсэн. Мөн долоон арилжааны банк болон бусад байгууллагуудаас лавлагаа мэдээлэл авахаар ажиллаж байна.

-Иргэн А.Амундраг гэрчээр дуудсан гэсэн. Тэрээр гэрчийн хамгаалалт авах хүсэлт гаргасан уу?

-А.Амундрад мөрдөгчийн дуудан ирүүлэх хуудсыг цахимаар хүргүүлсэн. Тэрээр гэрч, хохирогчийг хамгаалах болон хамтран ажиллах этгээдээр тогтоолгох хүсэлтээ илэрхийлсэн. Бид үүнийг хуулийн хүрээнд судалж байна. Хууль эрх зүйн зохицуулалтаар мөрдөгч саналаа прокурорт гаргаж, прокурор шүүхэд танилцуулснаар шүүх эцэслэн шийдвэрлэдэг. Одоогоор гадаадад байгаа тул өөрийн оршин суугаа улс дахь Монгол Улсын Элчин сайдын яамаар дамжуулан албан ёсны хүсэлтээ ирүүлэх ёстойг түүнд мэдэгдсэн.

-ЗТЯ-ны Төрийн нарийн бичгийн дарга асан Б.Насантогтоход холбогдох хэргийн явц ямар байна вэ?

-Б.Насантогтоход холбогдох хэргийн мөрдөн шалгах ажиллагаа дуусаж, шүүхэд шилжүүлэхэд бэлэн болоод байна. Түүнийг Эрчим хүчний яамны Төрийн нарийн бичгийн даргаар ажиллаж байхдаа бусдад давуу байдал олгож, хахуульд орон сууц болон бэлэн мөнгө авсан, үндэслэлгүйгээр хөрөнгөжсөн гэж үзэж байгаа. Мөрдөн шалгах ажиллагааны явцад 7.5 тэрбум төгрөгөөр үнэлэгдэх 17 үл хөдлөх хөрөнгө, гурван тээврийн хэрэгслийг битүүмжилсэн. Уг хэрэгт нийт долоон хүн, нэг хуулийн этгээдийг яллагдагчаар татан шалгаж байна.

-Хууль зүйн сайд асан  Б.Энхбаяртай холбоотой асуудлууд шалгагдаж байгаа юу?

-Иргэн Нямжав болон Уламбаяр нараас гэрчийн мэдүүлэг авсан. Мөн 1.3 сая ам.долларын хөрөнгийн шилжилт хөдөлгөөнийг шалгах санхүүгийн мөрдөн шалгах ажиллагааг шуурхай зохион байгуулж байна. Энэ хүрээнд гадаад улсын ижил чиг үүрэг бүхий байгууллагуудтай хамтран ажиллаж байгаа. Их хэмжээний мөнгөн дүнтэй холбоотой асуудал тул мөнгөний урсгалыг хянаж шалгахад цаг хугацаа шаардлагатай байна.

-Эрчим хүчний салбартай холбоотой бусад хэргүүд юу болсон бэ?

-"Эрдэнэт Булганы цахилгаан түгээх сүлжээ" ТӨХК-ийн албан тушаалтнуудад холбогдох хэргийг шүүхэд шилжүүлэх саналтайгаар прокурорт хүргүүлсэн. Мөн Н.Тавинбэх нарт холбогдох хэргийн мөрдөн шалгах ажиллагаа дуусах шатандаа орсон. УИХ-ын гишүүдтэй холбоотой хэргүүдийн тухайд прокурорын зөвшөөрлөөр, хуульд заасан хүрээнд мэдээлэл өгөх боломжтой байдаг. Одоогоор тодорхой тооны гишүүдийг шалгаж байгаа ч нарийн мэдээллийг нууцын зэрэглэлтэй тул мэдээлэх боломжгүй байна.