С.Баяр: Ерөнхий сайдаас буухад өгсөн УНҮ0009 дугаараа буцаагаад өгч болно. Асуудал алга

Улсын Их Хурлын гишүүн Ө.Шижир 2026 оны дөрөвдүгээр сарын 2-ны өдөр Төрийн тусгай хамгаалалтын газрын эзэмшилд байсан автомашины улсын дугааруудыг үе үеийн Ерөнхий сайд нар болон өндөр албан тушаалтнууд хувьдаа авч, өөрийн болон хувийн компаниудын нэр дээр шилжүүлэн бүртгүүлсэн талаарх баримтуудыг олон нийтэд дэлгэсэн билээ. 

Тэрээр энэхүү үйлдлийг төрийн өмчийг хувьдаа завшиж буй хэлбэр хэмээн шүүмжилж, хууль бус бүртгэлүүдийг цуцлах шаардлагатайг мэдэгдсэн юм.

Тодруулбал, Ерөнхий сайд асан М.Энхболдын нэр дээр "0012 УНҮ" улсын дугаар бүртгэлтэй байгаа бол "0008 УНҮ" дугаар нь улс төрийн нөлөө бүхий этгээдүүдийн хамаарал бүхий "Алтай [....] ХХК"-ийн нэр дээр шилжсэн болохыг Ө.Шижир гишүүн мэдээлэлдээ онцолсон. Эдгээр дугаарууд нь угтаа төрийн өндөр түвшний хамгаалалтад ашиглагдах ёстой байсан ч албан тушаалаа өгөхдөө хувьдаа авч үлдсэн нь ёс зүйн болон хууль эрх зүйн зөрчил дагуулж байна гэж үзэж байна.

Энэ талаар Ерөнхий сайд асан С.Баяр хариу өгчээ. Тэрбээр,

-Арван хэдэн жилийн өмнөх явдал. Ерөнхий сайд нар 1-р зэргийн хамгаалалтад байдаг. Тэр албанаасаа буухад 3-р зэргийн хамгаалалтанд ордог. Тэрний хугацаа нь дуусахад УНҮ0009 гэх дугаарыг Төрийн тусгай хамгаалалтын албанаас надад дурсгал болгон хадган дээр тавьж гардуулсан. Одоо хүртэл машин дээр маань хадаастай. Нөгөө хоёрт маань ч бас тэгж дурсгасан биз. Хулгай хийгээгүй, худалдаж аваагүй. Тэр дугаарыг буцаагаад өгч болно, хэрэгтэй гэж буй бол. Асуудал алга гэсэн байна.