🔴 Я.Содбаатар: С.Амарсайхан өөрөө нэрээ татаж, С.Бямбацогтыг УИХ-ын даргад нэр дэвшүүллээ

МАН-ын Удирдах зөвлөл хуралдаж, УИХ-ын даргад Сандагийн Бямбацогтыг нэр дэвшүүлэхээр 100 хувийн саналаар шийдвэрлэжээ. Энэ талаар МАН-ын Ерөнхий нарийн бичгийн дарга Я.Содбаатар мэдээлэл өгөхдөө, тус шийдвэр нь Улс төрийн намын тухай хууль болон МАН-ын 31 дүгээр Их хурлаар баталсан шинэ дүрмийн хүрээнд хийгдэж буйг онцоллоо.

Парламентын засаглалтай орнуудын нийтлэг жишгээр олон удаа сонгогдсон, туршлагатай гишүүд УИХ-ын даргын албыг хашдаг. Энэхүү уламжлалын дагуу намын дарга парламентад олон удаа сонгогдсон нэр бүхий гишүүдтэй уулзаж, санал бодлыг нь сонссон байна. Улмаар УИХ-ын даргад С.Бямбацогт, С.Амарсайхан нарын хоёр хүний нэрийг дэвшүүлэхээр ярилцжээ.

Гэвч Удирдах зөвлөлийн хуралдааны өмнө С.Амарсайхан гишүүн нэрээ татаж авах саналаа илэрхийлсэн байна. Тэрээр намын даргатай зөвшилцөхдөө улс орны нийгэм, эдийн засгийн нөхцөл байдал болон төрийн ажлын уялдаа холбоог харгалзан үзэж, С.Бямбацогт гишүүнийг дэмжих байр суурьтай байгаагаа мэдэгджээ. Ингэснээр Удирдах зөвлөлийн гишүүд С.Бямбацогтыг санал нэгтэйгээр дэмжиж, одоо УИХ дахь МАН-ын бүлгийн хуралдаанд танилцуулахаар болоод байна.

Засгийн газрын бүрэлдэхүүн болон бусад улс төрийн намуудтай хамтрах эсэх асуудлын тухайд Я.Содбаатар тайлбарлахдаа, энэ нь Монгол Улсын Үндсэн хуулиар Ерөнхий сайдад олгогдсон бүрэн эрхийн асуудал гэдгийг тодотгов. Ерөнхий сайд бүрэн эрхийнхээ хүрээнд танхимын бүрэлдэхүүн болон бүтцийн асуудлыг шийдвэрлэх бөгөөд одоогоор намын Удирдах зөвлөлд энэ талаар тодорхой байр суурь танилцуулаагүй байгааг хэллээ.

МАН-ын зүгээс төрийн албан тушаалын томилгоог ямар нэгэн хуйвалдааны зарчмаар бус, зөвхөн хууль болон намын дүрмийн хүрээнд явуулж байгааг тэрээр онцлон тэмдэглэв. УИХ-ын даргыг сонгох процесс хуулийн дагуу бүлгийн хуралдаанаар хэлэлцэгдэж, улмаар УИХ-ын нэгдсэн чуулганаар эцэслэн шийдэгдэх юм.