🔴 А.Ариунзаяа: Улс төрийн өшөө авалтаа одоо зогсоо

УИХ-ын гишүүн А.Ариунзаяа цаг үеийн нөхцөл байдалтай холбогдуулан мэдээлэл өглөө.

Тэрбээр, Анх намын удирдлагыг дэмжиж, эв нэгдлийг эрхэмлэхээр тохиролцсон ч бодит байдал дээр улс төрийн өшөө авалт, хонзон авах ажиллагаа зогсохгүй даамжирч байна. Тухайлбал, намын 105 жилийн ойн баярын хурлын үеэр шүүхээр гэм буруутай нь тогтоогдоогүй байхад гишүүдээ намаас хөөнө гэх мэдэгдэл хийсэн нь ардчилсан зарчимд нийцэхгүй байна.

Ерөнхийлөгчийн өргөн барьсан хуулийн төсөл нь цаад агуулгаараа жагсаалтаар сонгогдсон гишүүдийг "ёс зүйн хариуцлага" нэрээр хянах, намын бодлогыг шүүмжилсэн тохиолдолд эргүүлэн татах боломжийг бүрдүүлж байна гэж үзэж байна. Энэ нь 126 гишүүнтэй болж, парламентын засаглалыг төгөлдөржүүлэх, нийгмийн олон талт төлөөллийг хангах зорилгоос ухарсан үйлдэл болж байгаа юм. Гишүүд үзэл бодлоо чөлөөтэй илэрхийлэх эрхгүй болж, зөвхөн удирдлагын заавраар "товчлуур дардаг" нөхцөл байдал руу түлхэгдэж байгаа.

Улс төрийн дарамт шахалт бодит жишээнүүдээр илэрч байна. Тухайлбал, УИХ-ын дэд дарга асан Х.Булгантуяаг чуулганы хуралдаан даргалсных нь төлөө "төрийн эрх мэдлийг хууль бусаар авсан" гэх үндэслэлээр ТЕГ-аас хэрэг үүсгэн шалгаж байгаа нь хууль зүйн хувьд үндэслэл муутай гэж үзэж байна. Мөн намын Ерөнхий нарийн бичгийн даргаар найман жил ажиллаж, сонгуулийн ялалтуудыг удирдсан Д.Амарбаясгаланг намын даргад өрсөлдөхөө илэрхийлсний дараа зохион байгуулалттайгаар харлуулах, гүтгэх ажиллагаа эрчимжсэнийг улс төрийн өшөө авалтын тод жишээ.

Парламентын засаглалыг хамгаалж, залуу гишүүдийг айдсаар удирдахыг зогсоох шаардлагатай. Эв нэгдлийг хангах ажлын хэсэг байгуулагдсан ч хэлсэн ярьснаасаа буцах тохиолдол гарч, улс төрийн орчин айдас хүйдэст автсан хэвээр байна. Хэрэв эв нэгдлийг үнэхээр эрхэмлэж байгаа бол ардчиллын баталгааг хангаж, парламентын гишүүдийн хараат бус байдлыг хүндэтгэх ёстой гэсэн байр суурийг илэрхийллээ.