🔴 Ж.Энхбаяр: УИХ-ын дарга хүн эв нэгдлийг хангагч, улс төрийн туршлагатай л хүн байх хэрэгтэй

Эдийн засгийн хөгжлийн сайд Ж.Энхбаяр цаг үеийн нөхцөл байдалтай холбогдуулан мэдээлэл өглөө.

Тэрбээр, Намын дүрмийн дагуу Удирдах зөвлөл хуралдаж, УИХ-ын дарга, дэд дарга болон намын бүлгийн даргыг томилох асуудлаар намын бүлэгт чиглэл өгөхөөр болсон. Энэхүү хурлаар шинээр бүрдэж буй парламентын удирдлагын бүтцийг эцэслэн хэлэлцэж, холбогдох шийдвэрүүдийг гаргах юм.

УИХ-ын даргын албан тушаалд өөрийн нэрээ дэвшүүлэхгүй гэдгээ өмнө нь мэдэгдэж байсан хэвээрээ байна. Харин дараагийн дарга нь ажлын болон улс төрийн өндөр туршлагатай хүн байх ёстой. Шинэ Үндсэн хуулийн зарчмаар 126 гишүүнтэй, олон намын тогтолцоотой болж буй энэ үед парламентыг олон ургальч үзлийн талбар болгож, төвийг сахисан байр сууринаас удирдаж авч явах чадвартай хүн шаардлагатай.

Засгийн газар Ардчилсан намтай хамтран ажиллах эсэх асуудлыг Ерөнхий сайд Удирдах зөвлөлд танилцуулахаар төлөвлөсөн. Гадаад орчин хүндэрч, хямралт нөхцөл байдал үүссэн энэ үед дотоодын эв нэгдэл, улс төрийн намуудын зөвшилцөл нэн чухал байна. Улс орны эрх ашгийн төлөө намын эрх ашгийг хойш тавьж, хуримтлагдсан асуудлуудыг хамтран шийдвэрлэх нь энэ цаг үеийн шаардлага гэж үзэж байна.

Засгийн газрын бүрэлдэхүүний тухайд Ерөнхий сайд өөрийн бүрэн эрхийн хүрээнд шийдвэр гаргах бөгөөд одоогоор хэвлэл мэдээллээр гарч буй сайд нарын томилгоотой холбоотой таамгууд үндэслэлгүй. Одоогоор намын дотоод асуудлаас илүүтэй УИХ-ын үйл ажиллагааг жигдрүүлж, бүтцээ бүрэн бүрдүүлэхэд анхаарч ажиллах нь нэн тэргүүний зорилт болоод байна.