🔴 Ч.Ундрам: Алслагдсан сум болон гэр хорооллын хүүхдүүд давжаарах хандлагатай байгаа бол аймгийн төв болон хотын хүүхдүүд илүүдэл жинтэй болж эхэлсэн

Ерөнхий боловсролын сургууль (ЕБС)-ийн Хоол үйлдвэрлэлийн хуулийн хэрэгжилтийн талаар өнөөдрийн Монгол Улсын Их хурлын Өргөдлийн байнгын хороогоор хэлэлцсэн. Энэ хууль нь "Үдийн хоол" хөтөлбөрийн суурь хууль бөгөөд УИХ-ын гишүүн, Өргөдлийн байнгын хорооны дарга О.Номинчимэг "Нэг хүүхдэд 2500төг төсөвлөж өгч байгаа. Тэр үед 11-12 мянган төгрөг байсан мах өнөөдөр 30 мянга давчихлаа. Хүүхэд биед шаардлагатай шим тэжээлээ авч чадаж байна уу" гэдэг асуудлыг хөндөж байгаа юм.

УИХ-ын гишүүн Ч.Ундрам сурагчдын эрүүл мэнд, хоол тэжээлийн асуудлаар байр сууриа илэрхийллээ. Эрүүл мэндийн яамнаас 2023-2024 онд хийсэн судалгаагаар 100 хүүхэд тутмын 20 нь илүүдэл жинтэй, 6 нь тарган, харин үлдсэн хэсэг нь өсөлт хоцролттой буюу туранхай байна. Нийт сурагчдын 21 хувь нь өсөлтийн ямар нэгэн асуудалтай байгаа нь үндэсний хэмжээний аюултай үзүүлэлт болохыг анхааруулав.

Гишүүн Ч.Ундрам судалгааны үр дүнг бүс нутгаар нь нарийвчлан гаргах шаардлагатайг онцоллоо. Тэрбээр орон нутагт ажиллах үеэр иргэдээс ирүүлсэн ажиглалтаас иш татан, алслагдсан сум болон гэр хорооллын хүүхдүүдийн өсөлт хоцорч, давжаарах хандлагатай байгаа бол аймгийн төв болон хотын хүүхдүүд илүүдэл жинтэй болж байгааг хэлэв. Иймд бодлого боловсруулахдаа байршлын онцлогийг харгалзах нь чухал гэж үзэж байна.

"Үдийн хоол" хөтөлбөрийн хэрэгжилт удаашралтай байгаад Ч.Ундрам гишүүн шүүмжлэлтэй хандав. 2020-2024 онд УИХ-ын эмэгтэй гишүүд санаачлан "Үдийн цай"-г "Үдийн хоол" болгож, төсвийг нь нэмэгдүүлсэн ч 2022 оны тогтоолын хэрэгжилт хангалтгүй байгааг тэрбээр дурдлаа. Ялангуяа дунд болон ахлах ангийнхныг хоолны хөтөлбөрт хамруулах ажил төсөв мөнгөний шалтгаанаар хойшилж буйд Засгийн газар, Сангийн яам онцгой анхаарах ёстойг санууллаа.

Сурагчдын хөдөлгөөний дутагдлыг арилгахын тулд нэг ээлжээр хичээллэдэг сургуулиудын цагийн хуваарийг өөрчлөх тодорхой шийдлийг тэрбээр санал болгов. Үдээс өмнө танхимын хичээл орж, үдээс хойш биеийн тамир, спорт, урлагийн дугуйлан хичээллүүлснээр хүүхдүүдийг дэлгэцийн хамаарлаас холдуулж, эрүүл мэндэд нь хөрөнгө оруулалт хийх боломжтойг онцолсон юм. Энэхүү зохицуулалтыг алслагдсан сумдын сургуулиудад удирдамж өгөх замаар шуурхай хэрэгжүүлэхийг Боловсролын яамнаас шаардлаа.

Түүнчлэн сургуулийн хоолны түүхий эдийг бэлтгэхдээ тухайн орон нутгийн малчдаас мах, сүүг шууд худалдан авах эрх зүйн орчныг бүрдүүлэх санаачилга гаргав. Ингэснээр хүүхдүүд шинэ, чанартай хүнс хэрэглэхээс гадна орон нутгийн иргэдийн орлогыг дэмжих давуу талтайг тэрбээр хэллээ.

Боловсролын яамны зүгээс нэг ээлжтэй сургуулиудын үдээс хойших хөтөлбөрийг шинэчлэх туршилт хийгдэж байгаа бөгөөд ирэх хичээлийн жилээс хэрэгжүүлж эхлэхээ мэдэгдсэн юм. Харин Эрүүл мэндийн яамнаас хөдөө орон нутагт нүүрс усны хэрэглээ давамгайлж байгаагаас өсөлт хоцролт үүсэж байгааг баталж, судалгааг бүсчлэн гаргаж танилцуулахаар болов.