🔴 Ж.Алдаржавхлан: Гадаад зээллэгээр Газрын тос боловсруулах үйлдвэр болон Эрдэнэбүрэнгийн усан цахилгаан станц хоёрыг хэрэгжүүлнэ

Төсвийн байнгын хорооны өнөөдрийн /2026.04.01/ хуралдаанаар Гадаад зээллэгийн ашиглалт, үр ашгийг нэмэгдүүлэх тухай хуулийн төслийн хэлэлцүүлгийн анхны хэлэлцүүлгийг хийлээ. Энэ үеэр УИХ-ын гишүүн Д.Энхтүвшин хуулийн төслийн 1 дүгээр зүйлд зарчмын зөрүүтэй санал гаргахаа илэрхийллээ. Хэдийгээр Дэгийн тухай хуулиар санал гаргах хугацаа дууссан ч тэрбээр уг асуудлыг эцсийн хэлэлцүүлгийн шатанд хэлэлцүүлэх нь зөв гэж үзэж байгаагаа хэлэв.

Тэрбээр, Хуулийн төслийн 1 дүгээр зүйлд тусгагдсан зорилго, хамрах хүрээг илүү тодорхой болгох шаардлагатайг онцолсон юм. Одоогийн төсөлд Улаанбаатар хотын тулгамдсан асуудал, түгжрэлийг бууруулах болон Засгийн газрын үйл ажиллагааны хөтөлбөрт тусгагдсан 14 мега төсөлтэй холбоотой ерөнхий заалтууд байгаа нь цаашид өөр төслүүд нэмэгдэх, төсвийн сахилга бат алдагдах эрсдэлийг үүсгэж болзошгүй гэж үзэж байна. Иймд хуулийн зорилгыг зөвхөн УИХ-аас соёрхон баталсан, үндэсний аюулгүй байдлыг хангах гадаад зээлийн эх үүсвэрээр хэрэгжих төслүүдэд чиглүүлэн өөрчлөн найруулах саналтай байгаагаа илэрхийллээ.

Ажлын хэсгийн ахлагч, УИХ-ын гишүүн Ж.Алдаржавхлан энэхүү саналыг дэмжиж байгаагаа илэрхийлэв. Тэрбээр ажлын хэсгээс бэлтгэсэн зарчмын зөрүүтэй саналын томьёололд Улаанбаатар хотын түгжрэл, орчны бохирдолтой холбоотой ерөнхий заалтуудыг аль хэдийн хассан болохыг тодотголоо. Мөн уг хууль нь зөвхөн Газрын тос боловсруулах үйлдвэр болон Эрдэнэбүрэнгийн усан цахилгаан станц гэсэн хоёр томоохон төсөлд зориулагдсан бөгөөд эдгээр төсөл хэрэгжиж дууссанаар хуулийн үйлчлэл зогсох зохицуулалттайг тайлбарлав.

Хэлэлцүүлгийн төгсгөлд УИХ-ын гишүүн Д.Энхтүвшин хуулийн төсөлд "14 мега төсөл" болон "импортыг орлох, зардлаа нөхөх боломжтой" гэх мэт субъектив шинжтэй заалтуудыг үлдээх нь өөр төслүүд нэмэгдэх "цонх" болж харагдаж байгааг дахин санууллаа. Тиймээс эдгээр заалтыг хасаж, хуулийн агуулгыг зөвхөн нэр заасан хоёр төсөлдөө нийцүүлэн эцсийн хэлэлцүүлгээр шийдвэрлэхийг ажлын хэсэг болон Байнгын хорооноос хүслээ.